22- fevralda  "12-ci oyunçu” azarkeş qrupunun üç illik yubileyi qeyd olunur.

"12-ci oyunçu”nun yaradılmasının  ideyası hələ 2005-cilin may ayında yaransa da fəaliyyətimiz  fərdi qaydada həyata keçirilən layihələrlə davam edirdi. Bu işlərdə fəallıq  2006-cı ildə daha da artdı. Həmin il müxtəlif yadda qalan işlər gördük, ən maraqlısı  dekabr ayında "Fırtınalar Meydanı”nda qəribə görüntü ilə davam edən layihəmiz oldu. Beləki, 2006/2007 çempionatının birinci dövrəsinin son oyununda "Xəzər Lənkəran” Qəbələnin "Gilan” (Qəbələ) klubu ilə qarşılaşırdı (09 dekabr 2006) və birinci dövrənin yekunlarına görə komandamız "qış çempionu” oldu. Fəal azarkeşləri bir yerə yığaraq hamılıqla Santa Klaus papaqları ilə stadionda qeyri adi formada azarkeşlik etdik. İki gün sonra "Futbol+” qəzeti bu hadisəni işıqlandırdı. Həmin çempionatın ikinci dövrəsində artıq fəal azarkeşlərlə çoxlu maraqlı layihələr həyata keçirməyə başladıq. Tribunalara toplaşan azarkeşlərə demək olar ki, hər oyunda ağ-yaşıl vərəqələr hazırlayıb paylayırdıq. ”Gələn il kimin yubileyidir ?” yazılmış plakatımız hələ də bir çox azarkeşin yaddaşındadır. Növbəti çempionatda "15000-lik stadion, 14999+sən " adlı layihə ilk cəhddən alınmasa da ikinci cəhdimiz uğurlu oldu və biz tribunaları tam doldura bilmişdik. Artıq "12-ci oyunçu” müstəqil fan klubunu yaratmışdıq (12-ci oyunçu mfk). 22-fevral 2008-ci ildə təsis yığıncağını keçirərək nizamnaməmizi təsdiq etmişdik. Azərbaycanın ilk müstəqil fan klubunun yaranması yenə də "Futbol+” qəzetinin 23-fevral tarixli nömrəsində işıqlandırılmışdı. Azərbaycanda ilk dəfə biz "Xəzər Lənkəran” klubu ilə əlaqə yaratmadan tam müstəqil formada fəaliyyətimizi qurmağa başlamışdıq. Fan klumuz üçün baraban aldıq, səfər oyunlarına gedərkən "Xəzər Lənkəran” klubunun təşkil etdiyi avtobuslarla deyil öz hesabımıza kirayələdiyimiz avtobuslarla yola çıxdıq. Fan klubun idarə heyyəti üzvlərinin şəxsi ianələri hesabına aldığımız parçalardan bayraqlar və müxtəlif atributlar hazırlayıb azarkeşlərə hədiyyə edirdik. "Fırtınalar meydanı”nın "E”- sektorunu özümüzə daimi məkan seçdik. Fan klubun yarandığı gündən düz bir il sonra 22- fevral 2009-cu ildə fan klumuzun internet saytını açdıq. Bir müddət sonra isə fan klubun fəaliyyətini dayandıraraq, fəaliyyətimizin formasında dəyişikliklər etdik. Bu günə qədər də "12-ci” oyunçu azarkeş klubu( azarkeş qrupu)  kimi fəaliyyət göstərən "12-ci oyunçu” olaraq "Xəzər Lənkəran”ın ən çətin günlərində də komandanın yanındayıq.  "12-ci oyunçu” azarkeş qrupunun fəaliyyətində milli komandanın Lənkəranda iki il öncə sentyabr ayında Finlandiya milisinə qarşı keçirilən matçda "NO RASİZM” adlı layihə də olmuşdur.

Biz Azərbaycanda futbol klubuna yaxın olmadan azarkeşlik etmək qaydasının bünövrəsini qoyduq, biz müstəqil fanat anlayışını ölkə futboluna gətirdik.  "12-ci oyunçu”- azad düşüncənin məhsuludur, beləcə qərarlarımızı da özümüz veririk və kimlərinsə iradəsinə tabe deyilik.

Biz bu illər ərzində çoxlu təzyiqlərə məruz qalsaq da, müxtəlif çətinliklərə sinə gərməyə çalışdıq və bacardıq. Bu illər ərzində saytımızı fəallaşdıraraq iki il ardıcıl olaraq ilin azarkeş saytı adının  qazanılmasına nail olduq. Bu illər ərzində "Xəzər Lənkəran”ın ev oyunları öncəsi məşqlərini fotoreportajlarla və məşqlərdə baş verən ən maraqlı məqamlarla saytımızda işıqlandırdıq. Bu sayt vasitəsi ilə sadə azarkeşlərin istəklərini ölkənin futbol ictimaiətinə çatdırdıq.

Hazırda da "Xəzər Lənkəran” ailəsinə qarşı haqsızlıq edilən zaman ən operativ raeksiyanı da biz veririk. Mətbuatda cənub təmsilçisinin azarkeşləri  haqqında xoşa gəlməz yazılara rast gəlinən zaman biz sinəmizi qabağa veririk, biz öz mənafemizi deyil ümumi azarkeş kütləsinin mənafeyini qorumağa çalışırıq. Biz ölkə futbolunda daha çox vətən sevgisini qabartmağı bacardıq. Yarandığı gündən "12-ci oyunçu”nun bir devizi vardır:

" Öncə vətəni, sonra səni sevdik "Xəzər Lənkəran” !”

22- fevral tarixi "12-ci oyunçu” üçün əlamətdar gündür -  ”12-ci oyunçu”nun yaranmasının üç illiyi, internet saytının açılmasının isə iki  illiyi qeyd olunur.