"Rapid” klubunun prezidenti Dinu Qeorqe və "Xəzər Lənkəran” klubunun baş məşqçisi Mirça Rednik bu gün görüşərək Stefan Qriqorinin və Çesinanın "Xəzər Lənkəran”a transferi ilə əlaqədar  məsələlərə aydınlıq gətirəcəklər. Eyni zamanda Lusian Radutanın da icarə əsasında "Xəzər Lənkəran”da oynaması variantını da müzakirə edəcəklər.

Rumın mətbuatına verdiyi açıqlamasında da Rednik bunu təsdiqləyib:

 "-Mən dünən Dinu Qeorqe ilə danışıb Çesina və Qriqorinin keçidinə münasibətimi bildirdim. Bir neçə günə isə bu məsələni bütün xırdalıqlarına qədər müzakirə edəcəyik. Adlarını çəkdiyim hər iki futbolçunu sonradan almaq imkanı şərti  ilə 6-aylıq icarə əsasında  istəyirəm, Lusian Raduta isə bu işdə mənim üçün bonus  oldu.”

Karlos Sezar Çesina 2007-ci ildə "Rapid” klubuna gələnə qədər 800.000 avro qazanırdısa, hazırda "Rapid”in heyətin də 300.000 avro qazancı ilə mövsüm ərzində komandanın  ən çox qazanan futbolçusudur. Rumın mətbuatı iddia edir ki,  "Xəzər Lənkəran” klubu Çesinanı əldə etmək üçün 500.000 avro ilə vidlaşmağa hazırdır. Tərəflər yaxın bir neçə gün ərzində futbolçuların keçidinə tam aydınlıq gətirəcəklər. Rednik hər üç futbolçunu əldə etmək  üçün cəmi 1.000.000 avro verməyə razıdırsa, "Rapid” rəhbərliyi Mirça Rednikin onlarla razılığa gələcəyinə ümid edir.