"Özbək plovu”  futbolçuları zədədən necə qoruyur...(Mütəxəssis fikri)

Özbək plovu əsasən keçmiş sovet respublikaları məkanında yaşayan millətlər arasında  məhşurdur. "Özbək plovu”nu bir neçə dəfə dadan insanların böyük əksəriyyəti bu xörək növünün  bişirilmə qaydasını və insana olan xeyrini bilmirlər. Nədənsə bu dəfə saytımızda məhz  "Özbək plov”undan söz salmaq  istədik və bunun üçün mütəxəssisə müraciət etdik.

Uzun illər öncə Daşkəndin "Paxtakor” komandasının bazasında aşbaz kimi çalışan və təyyarə qəzasında sağ qalan yeganə şəxs Qoribjon Nasimjonov bunları dedi:

Mal əti— 1 кq, yer kökü— 6 əd, baş soğan— 7 əd, sarımsaq — 1 əd, günə baxan yağı, düyü və duz.

Düyü ayrıca qaynadılır və öz növbəsini gözləyir.

Ət qaynar yağda qızardılır, daha sonra əlavə edilən soğan da qızardılır, sonra yer kökü  də eyni qayda ilə bişirilir. Üzərinə xörəyin həcmindən iki barmaq yuxarıda olmaq şərti ilə qaynar su əlavə edilir, ardıyca duz və digər ədviyyat,  sonra isə qaynadılmış düyü əlavə edilir. Tam bişəndən sonra xörəyin üzərinə sarımsaq bütöv şəkildə qoyulur.

Gərgin keçən gün  sonrası, məsələn nəticəsi qane etməyən bir futbol oyunundan sonra, arxadan ayağa zərbə alandan sonra özbək plovunun insana çox xeyri dəyə bilər.  Bu yemək həm əsəbləri sakitləşdirər, həm də ağrıların qarşısını ala bilər. Eyni zamanda  futbol oyununda güclü toqquşmalar zamanı ayaq sümüklərini sınmalardan da qoruya bilər. Dünyanın bəzi yerlərində bu tipli yeməklər bir o qədər də sevilmir. Məsələn cənubi Amerika dövlətlərində bu yemək heç vaxt bəyənilməyib. Məhz o səbəbdəbdir ki, bir çox Braziliyalı idmançılar, xüsusən də futbolçular  oyun zamanı adi toqquşma nəticəsində ağır zədələr alırlar. Belə vəziyyətdə hətta ayaqları sınanlar da olur.

Yaxın gələcəkdə futbola hər hansı bağlılığı olan insanların yemək rasionu haqqında yazılar dərc etmək fikrindəyik. Növbəti yazılarda isə oyunda  hakim hesabına qalib gələndən sonra rəqib komandanın paltardyişmə otağına gedəndə məğlub futbolçuların ürəyini hansı yemək növləri ilə almaq olar sualına cavab tapa biləcəksiniz. Ardıyca oyun sonrası hakimlər otağına fransız yeməkləri ilə daxil olmanın əhəmiyyəti  bütün xırdalıqlarına qədər açıqlanacaq.  Bizi izləyin...

Qeyd: "Özbək plovu" barədə söz salmaqla biz, "Neftçi"nin özbək futbolçusu Boxadur Nasimova sataşmaq fikrindən uzağıq. Eyni ilə kiminsə təyyarə qəzasından sağ çıxması fikri də premyer liqanın bombardirinə, komandasının AZAL-la oyunda az qala zədələnəcəyinə işarə edilərək söz atmaq üçün vurğu ilə yazılmayıb. Biz inanırıq ki, Nasimov buraya pul üçün deyil Azərbaycan futbolunun yüksəlməsinə xidmət etmək üçün gəlmişdir və onun istəyində israrlı olduğuna da şübhə etmirik.