Məşq bitəndən sonra stadionun həyətində Kamran Ağayev və onun  bir neçə fanatı qalmışdı. Mühafizəçilər  isə kənarda qalıb tamaşa edirdilər . Bunu  Kamranın  öz fanatları ilə rahatca söhbət etməsinə şərait yaradılması kimi başa düşdük.  Maraqlı söhbətin getdiyini anlayıb geri qayıtdıq və   müdaxilə də etdik.  Onlar premyer liqanın növbəti turunda keçiriləcək oyunları müzakirə edirdilər.  İlk növbədə  "Neftçi”nin   AZAL-la  keçirəcəyi  oyun  əsas müzakirə mövzusu idi.

Səmimi söhbət zamanı  Kamran,  fanatların marağına səbəb olan bir məqamı  açıqladı.  Sən demə Kamran Ağayevin həmişə oyun zamanı  ayağına geydiyi  butsunun üzərində onun adı yazılıbmış. Ağayevin dediyinə görə bu xüsusi sifarişlə istehsalçı şirkət tərəfindən  belə hazırlanıb.  Yaxınlaşıb diqqətlə baxdıqda  həqiqətən də butsunun üzərində  "Kamran”  yazıldığını gördük.  Sonda  Kamranın fanatları onunla birgə şəkil çəkdirmək də istədilər.