Pitsurka 70-ci legionerimiz oldu.

 Azərbaycanın Unibank Premyer Liqasının XX turunun "Neftçi” ilə oyununda 8 futbolçu "Xəzər Lənkəran”ın heyətində debüt etdi. Belə ki, Simao Bruno, Andrey Mureşan, Adrian Pit, Hristu Kiaku, Adrian Skarlatake, Julius Vobay, Elnur Abdullayev, Aleksandr Pitsurka karyeralarında ilk dəfə komandamızın formasında meydana çıxdı. Bu matçadək klubumuzun tarixi ərzində 113 oyunçuya bu nəsib olmuşdu. Debütantlarımız bu rəqəmi 121-ə çatdırdılar.

 Bu oyunçulardan yalnız Elnur yerli futbolçudursa, digərləri legionerlərdir. Bu isə o deməkdir ki, "Xəzər Lənkəran”ın 7 illik tarixi ərzində 70 əcnəbi komandamızın formasını geyib. Belə ki, "Neftçi” ilə qarşılaşmayadək 63 legioner bunu bacarmışdı. Bu görüşdə hamıdan gec – 90-cı dəqiqədə meydana çıxan Pitsurka "Xəzər Lənkəran” tarixinə yubiley – 70-ci legioner kimi düşdü.

 Yeddi debütant legionerdən 5-i Rumıniyanı, 1-i Portuqaliyanı, 1-i isə Syerra-Leoneni təmsil edir. Afrika ölkəsindən olan Vobay klubumuzun tarixinə ilk syerra-leoneli kimi düşüb. İndiyədək 25 ölkədən gələn futbolçulara güvənən komandamız üçün bu ölkə 26-cı olub.

 Simao isə Portuqaliyadan gəlmiş 2-ci futbolçumuzdur. Rumıniyalı "5-lik” isə öz ölkələrinin "Xəzər Lənkəran” tarixindəki təmsilçilərinin sayına görə vahid liderliyə yüksəldib. Artıq rumıniyalılarımızın ümumi sayı 14-dür: Rumıniya – 14, Türkiyə - 9, Braziliya – 8, Belarus, Serbiya – hərəsi 5, Bolqarıstan - 4, Albaniya, Gürcüstan, Kolumbiya, Portuqaliya, Litva – hərəsi 2, Çexiya, Estoniya, Fransa, Honduras, İsveç, Kot d’ivuar, Moldova, Nigeriya, Qana, Rusiya, Slovakiya, Argentina, Kosta-Rika, Latviya, Syerra-Leone – hərəsi 1.

Mənbə: lankaranfc.com