"Xəzər Lənkəran” komandasının avtobusu  saat 15:15-də "Fırtınalar Meydanı”nın ərazisinə daxil oldu.

Bir saatlıq istirahətdən sonra komanda yardımçı meydançada məşqə başladı. Rahid Əmirquliyev, Elnur Allahverdiyev və Kamran Ağayev millinin təlim məşq toplantısına qatılmaq səbəbindən komanda ilə olmadıqca, David İmedaşvili və Tural Cəlilovun qayıdışı sevindirici xəbər oldu. Elə gənc futbolçular Amid Hüseynov, Kazım Kazımlı və Orxan Sadıxlının da əsas heyyətlə birgə  həvəslə məşq etməsi məşqi izləyən azarkeşlər tərəfindən yaxşı qarşılandı. Allan Lalin hələ özünü yaxşı hiss etmədiyindən, Uinston Parks isə beyin silkələnməsinə məruz qaldığı üçün müalicə aldığından  məşqə qatıla bilməmişdilər.

Məşqi izləyən zaman bizi görən Alim Qurbanov həmişəki kimi bizimlə özünəməxsus şəkildə  salamlaşdı. Ruslan Poladov da elə həmişə olduğu kimi bütün diqqətini Rednikə yönəltmişdi. Kristian Kabral bu dəfə daha şən idi.

Stadionun həyətinə daxil olub məşqi izləməyə gələn azarkeşləri mühafizəçilər salamlaşaraq qarşılayırdılar ki, bu da ümumilikdə gözəl atmosferin yaranmasına xidmət etdi.

"Xəzər Lənkəran” klubunun prezidenti Mais Mənsimov həmişə olduğu kimi məşqi komandanın rəisi Səməd Mustafayevlə birgə azarkeşlərin yanında izlədi.