Bu gün "Xəzər Lənkəran” Futbol Klubu növbəti mühüm müqaviləyə imza atıb. Əsas komanda ilə yanaşı aşağı yaş qruplarını da daima diqqət mərkəzində saxlayan klubumuz bu səmtdə növbəti vacib addımını atdı. Belə ki, təcrübəli hollandiyalı məşqçi Fabian Veldviyk bundan sonra "Xəzər Lənkəran”da çalışacaq. İdman direktoru vəzifəsinə təyin olunan Veldviyk aşağı yaş qruplarına cavabdeh şəxs kimi bu sahəyə bilavasitə nəzarət edəcək.

Müxtəlif komandaların aşağı yaş qruplarında iş üzrə böyük təcrübəyə malik olan Veldviyk bu sahədə ixtisaslaşmış mütəxəssislərdəndir. Karyerası ərzində Hollandiyanın "Sparta” (Rotterdam), "Volendam” və "TOGR” klublarında uğurlu fəaliyyət göstərmiş məşqçi, həmçinin İngiltərənin "Blekbern Rovers” klubunda da çalışıb. Müxtəlif illərdə UEFA-nın "C”, "B” və "A” lisenziyalarını alan Veldviyk nəhayət 2010-cu ildə ən yüksək məşqçilik kateqoriyası sayılan "PRO” lisenziyasına da sahib olub. 37 yaşlı mütəxəssis ötən il Hollandiyanın "SCO`63” futbol klubu üçün Gənclərin İnkişafı Layihəsini hazırlamaqla öz karyerasında daha bir uğurlu addıma imza atmışdı.

Ən yuxarı kateqoriyaya malik olan məşqçinin işə cəlb olunması klubumuzun oyunçu yetişdirmə siyasətinə nə qədər ciddi yanaşdığının növbəti nümunəsidir. "Xəzər Lənkəran” Futbol Klubu mütəxəssisə klubdakı işində uğurlar arzulayır və onun işinin komandaya fayda verəcəyində əminliyini bildirir.

Mənbə: lankaranfc.com