- "Gəncə" məğlubiyyətinin ardından "Turan" üzərində qələbədən sonra komandada durum necədir?

- Etiraf edim ki, məğlubiyyətdən sonra futbolçularımızda gərginlik vardı. Qələbənin ardından isə artıq hər şey qaydasına düşüb. İndi bütün diqqət "Qarabağ"la oyuna yönəlib.

- Rəqib haqda lazımı məlumatlara maliksinizmi?

- Əlbəttə. Rəqibimiz güclü, təcrübəli və lider komandalardan biridır. "Qarabağ"ın əksər oyunçuları ölkə yığmasında çıxış edir və futbolçular meydanda bir-birilərini çox yaxşı başa düşürlər. Klubun baş məşqçisi Qurban Qurbanov gənc olmasına baxmayaraq, səviyyəli komanda formalaşdırıb. Ancaq biz də boş dayanmamımışıq. Rəqibin nəyə qadir olduğunu yaxşı bilirik. Komandamız da oyuna ciddi hazırlaşır və nəticə qazanmaq üçün bütün gücümüzü ortaya qoyacağıq. 

- "Qarabağ"ın sirləri nədir?

- (gülür). Bu haqda danışmağı xoşlamıram. Meydanda rəqibin zəif tərəflərindən yararlanmağa çalışacağıq.

- Qələbəyə söz verirsinizmi?

- Həmişə olduğu kimi, komandam meydana maksimum nəticə göstərmək üçün çıxacaq. Çox istərdim ki, qalib gələk. Ancaq qələbə qazanacağımıza söz vermirəm. Hər şeyi oyun göstərəcək. 

- Qarşıdakı oyun ərəfəsində itkilər varmı?

- Bəli, təəssüf ki, oyuna ciddi itkilərlə çıxacağıq. Davit İmedaşvili və Emeka Opara zədəlidirlər. Düşünürəm ki, "Qarabağ"la oyun bizim üçün asan olmayacaq. 

- Çempionluğa söz vermizsiniz. Razılaşın ki, bunun üçünsə qələbə vacibdir...

- Mən sözümün üstündə dururam. Bütün oyunlarda qələbə üçün əlimizdən gələni edəcəyik.

- Turnir cədvəlindəki vəziyyəti qanunauyğunluq hesab edirsinizmi?

- Bəli. Ümumilikdə çempionatın gedişatından razıyam. Hazırda hər kəs gücünə görə turnir cədvəlində mövqe tutub. Ancaq qarşıda uzun marafon var və əsl mübarizə qabaqdadır.

- Rumıniya milli komandasında çalışmaq istərdinizmi?

-    Bu barədə qəti düşünmürəm. Bizim üçün bütün şərait yaradılıb. Heç bir şikayətim yoxdur. Düzdür, bütün məşqçilər ölkəsinin milli komandasında çalışmağı arzulayır. Ancaq hazırda bütün diqqətimi Azərbaycandakı işlərimə yönəltmişəm. "Xəzər Lənkəran”la müqaviləm var və heç yerə getmək fikrim yoxdur.

Mənbə: supersport.az