Lankaranfc.com:
“Muğan”la oyuna giriş biletsiz olacaq
Həftəsonu Azərbaycan Premyer-liqasının VI turu çərçivəsində “Xəzər Lənkəran”ın “Muğan”ı qəbul edəcəyi oyuna giriş biletsiz olacaq. Bu addım ilk növbədə bir həftə öncə komandamızın “Bakı”ya qarşı keçirdiyi oyunun təxirə düşməsi üzündən aldıqları biletlərdən istifadə edə bilməyən azarkeşlərin haqqını qaytarmaq üçün atılıb.
Klub rəhbərliyi əvvəlcə “Bakı”yla təxirə salınmış oyuna satılmış biletlərin matç yenidən keçirəcəyi zaman qüvvədə olması qərarını vermək istəsə də, sonra da azarkeşləri çox intizarda qoymamağı düşünüb. Komandamızın növbəti rəqibi – “Muğan” cari mövsümün sürprizidi və salyanlılar ilk dörd turdan sonra çempionatın liderləridi. 360 dəqiqə ərzində qapısında qol görməyən, Bakıda “Neftçi”ni iki cavabsız qolla keçən və Lənkərana növbəti sensasiya ardınca gəlməyə hazırlaşan “Muğan”la oyun turun ən əsas və ən maraqlı qarşılaşmalarından olacaq.
Son iki oyunda qələbə qazanmayan komandamızın “qara zolaq”dan qurtulması üçün klub rəhbərliyi “Bakı”yla təxirəsalınmış oyuna biletləri olanlarla yanaşı, bilet alıb, lakin onu saxlamayan və güclü yağış üzündən həmin oyuna gələ bilməyən azarkeşləri də unutmayıb. Məhz bu səbəbdən “Muğan”la oyun yalnız təxirəsalınmış “Xəzər Lənkəran”-“Bakı” oyununa bileti olanlar deyil, bütün digər azarkeşlər üçün də pulsuz olacaq.
Ümid edirik ki, bu aksiya sayəsində “Xəzər Lənkəran” mərkəzi stadionunun anşlaq intizarına da son qoyulacaq. “Xəzər Lənkəran”ımıza dəstək olaq, lideri Lənkəranda büdrədək!