Aprelin 27-də Azərbaycan Kuboku uğrunda turnirin 1/2 final mərhələsinin ilk oyunları keçiriləcək. Saat 16.00-da Bakının “Şəfa” stadionunda “Xəzər Lənkəran” “Olimpik-Şüvəlan”ın qonağı olacaq. Cari mövsüm iki dəfə üz-üzə gəlmiş komandalar hərəyə bir qələbəyə sevinib və hər iki tərəf öz meydanında daha bacarıqlı olub. İndi isə növbə kubok qarşılaşmalarınındı. Qeyd edək ki, komandamızdan fərqli ölkə çempionatının təsnifat mərhələsinin yekunlarına görə “ilk altılığ”a düşə bilməyən şüvəlanlılar üçün ölkə kubokunun finalına vəsiqə qitə kuboklarına aparan yeganə yoldu.