*******************************************
Qismət Rüstəmov.Şeir.
*******************************************
Bir az tut arağı, bir az da xəngəl,
Hakimi meydanda yuxu aparır.
O qədər "oyun" var oyundan əvvəl,
Oyunlar oyundan əvvəl qurtarır.
********************************************
Hakimlər susdular fitin diliylə,
İrlandlar qrupun dibinə düşdü.
Anri pas ağacı əkdi əliylə,
Meyvəsi kiminsə cibinə düşdü.
********************************************
Dollardan çərpələng uçurmadınsa,
Yuxarı dirəkdən asılmalısan.
Kiminsə cibində qol vurmadınsa,
Ofsayda abunə yazılmalısan.
********************************************
Ay futbol, incimə qısa və kəsə...
Nə azdı, nə də çox, elə beləsən.
Cibindəki qazon "yaşıl" deyilsə,
Rəqiblər önündə üzü "pelesən".
********************************************
Yığışaq bunlara al-ver düzəldək,
Bunlar bu futbolu atsın, yaşasın.
Foqtsda "Sədərək"də bir yer düzəldək,
Arvad alt paltarı satsın, yaşasın.
***********************************************
Milli komandanın əcnəbi dostu,
Sən demə, çoxdandı bizə atırmış.
"Vosmoy" bazarında görüblər Foqtsu,
Qazonu göyərti kimi satırmış.
************************************************
Eynək almalıyıq bunlara hələ,
Bunlar sağa baxır, sol kimi görür.
Tofiq Bəhramovun heykəli belə,
Girməyən topları qol kimi görür.
************************************************
Bunlar başa düşmür adam dilində,
Ay görüm, bunların qıçı qırılsın.
Görüm AFFA-nın da, PFL-in də,
Dirəyi titrəsin, toru cırılsın!
*************************************************
Cibinə tökülən pulları sayır,
Biabır eləyib ətrafa bizi.
Bizi uşaq sayır top-top oynayır,
Toruna sarıyıb bu AFFA bizi.
*************************************************
Bir az əsəbləşib ağ eləsəm də,
Arabir özümdən acığım gəlir.
Nə qədər gülsəm də, lağ eləsəm də
Mənim bu millətə yazığım gəlir.
**************************************************
Hər gecə kədərdən top ağlayıram...
**************************************************
Mənbə - FutbolPress.az