- "Xəzər Lənkəran”ın azarkeşlərini komandanın müdafiə xəttinin mərkəzi narahat edir və yeni, daha mükəmməl heyyət qurmaq işinə start verildi. “lankaranfc.com” internet səhifəsində keçirilən sorğu başa çatıb. “Fikrinizcə hazırda “Xəzər Lənkəran”ın ən zəif mövqeyi hansıdır?” sualına cavab verən oxucular hesab edir ki, komandamızın axsayan mövqeyi müdafiə xəttinin mərkəzidir. Görünür, yeniləşmiş müdafiə xəttinin adaptasiyaya ehtiyacı mövsümün ilk yarısında özünü aşkar büruzə verib. Mövsümlərarası dövrdə heyətə iki mərkəz müdafiəçisinin (İvan Pexa və Tomas İneman) cəlb olunması və mövsümün gedişində onların hər ikisinin az qala məcburiyyətdən əsas heyətə buraxılması təsirsiz ötüşməyib. Premyer Liqanın startından cəmi ay yarım sonra Kostadin Canbazovun icazəsiz şəkildə komandamızın düşərgəsini tərk etməsi, Ruslan Poladov zədələndikdən sonra braziliyalı Denis Silvanın mərkəzdən sağa çəkilməsi təsirsiz ötüşməyib və komandamız “Qarabağ”dan sonra çempionatın ən az qol buraxan (17 oyun, 10 qol) komandası olmasına baxmayaraq, azarkeşlərin əksəri (34%) müdafiənin mərkəzini “ən zəif bənd” bilir. 1044 nəfərin qatıldığı sorğunun nəticələrinə görə, respondentlərin 19%-ni hücum xətti, 14%-ni isə yarımmüdafiənin mərkəzi narahat edir. Əvəzində “Xəzər Lənkəran”sevərlər cinahlardan və dayaq yarımmüdafiə zonasından razıdırlar. Bu arada isə “Xəzər Lənkəran” Türkiyənin Belek şəhərində bir araya gələrək təlim-məşq toplanışına başlayıb. Ayın 28-dək davam edəcək hazırlıq prosesinin gedişində komandamız qüvvəsini dörd yoxlama oyununda sınayacaq. Komandamız qonşu ölkədə hazırlığa aşağıdakı heyətdə başlayıb: Kamran Ağayev, Dima Kramarenko, Zabit Səfərov, Ruslan Poladov, İvan Pexa, Tomas İneman, Radomir Todorov, Dieqo Qusmao, Devran Ayhan, Rahid Əmirquliyev, Junior Osvaldo, Alim Qurbanov, Nizami Hacıyev, Ramazan Abbasov, Denis Kalinkov, Mario Souza, İvan Svetkov, Allan Lalin. Qarşıdakı günlərdə “Xəzər Lənkəran”ın məskunlaşdığı beş ulduzlu Cornelia De Lux Resort hotelinə müxtəlif vaxtlarda ona yaxın futbolçu qoşulacaq ki, məşqçilərimiz sınadıqdan sonra onlardan bir neçəsini heyətə cəlb edəcək. Bazar günü – yanvarın 17-də “Xəzər Lənkəran” ilk sınaq oyunu keçirəcək. Böyük ehtimalla komandamızın ilk sparrinq-rəqibi Belarus təmsilçisi “Vitebsk” olacaq. Qeyd edək ki, komandamızla yanaşı Rusiya Premyer-liqasının təmsilçisi “Rostov” və Almaniyanın 3-cü liqasından “Unterhahinq” də Cornelia De Lux Resort-da məskunlaşıblar.
|