"Poçt qutusu”

"Xəzər Lənkəran” klubunun rəhbərliyi tərəfindən mətbuata açılqlama verilərək qeyd edilir ki, "Neftçi” klubunun fanatlarının xoşa gəlməz davranışından klub rəhbərliyinə şikayət məktubu göndərilib. "Neftçi” tərəfi isə ardıcıl iki dəfə rəsmi bəyanat verərək bu məktubun onlara  çatmadığını bildirir. Düzdür "Xəzər Lənkəran” məcburiyyət qarşısında qalıb məktubun surətini mətbuata təqdim edir və beləcə məktubun məzmunu hamıya bəlli olur. Bu da  "Neftçi” klubunu qane etmir və onlar  iddia edirlər ki, belə məktubların mətbuata təqdim olunması  yaxşı əməl deyil ...

Heç bir çıxış yolunu göstərməyən "Neftçi” rəhbərliyi əslində bu məsələdə məsuliyyətdən yaxa qurtarmaq istəyir. Beləki,fanatlarının yersiz  hərəkətlərinə nəzarəti çoxdan itirən "Neftçi” klubunun rəhbərliyi sadəcə mətbautdan məktubun məzmunu  ilə tanış olub ölçü götürməli idi. Yoxsa ardıcıl iki dəfə bəyanat yaymaq nəyə lazım idi.

Bu məktub qalmaqalında  "Poçt qutusu”  hekayəsi yada düşür. Amma müasir dövrümüzdə poçt qutusu yenidən yazılsaydı bu dəfə yəqin ki,  məktubu alan tərəf əsərin qəhrəmanına çevrilərdi…

Təsəvvür edin ki, "Neftçi” klubunun mətbuat departamentinin əməkdaşları, onlara məktubu çatdırmaq istəyən  poçtolyonla dava dalaşa çıxır…

Qeyd edək ki, "Xəzər Lənkəran” tərəfin etirazına səbəb , "Qarabağ” – "Neftçi” oyununu tribunadan izləyən "Xəzər Lənkəran”ın baş məşqçisi Mirça Rednikin və onun köməkçisi  Mihay Kejanın, həmçinin komandanın kapitanı Kamran Ağayevin "Neftçi” fanatları tərəfindən təhqirə məruz qalmaları olmuşdur. Onu da əlavə edək ki, həmin oyunda və müxtəlif vaxtlarda keçirilən  digər oyunlarda da dəfələrlə "Neftçi” fanatları "Xəzər Lənkəran” klubu və onun azarkeşləri barədə təhiqramiz şüarlar səsləndiriblər.

Qeyd: Yazı hazır olandan sonra bir qrup "Xəzər Lənkəran" azarkeşi bizimlə əlaqə saxlayıb maraqlı təklif irəli sürdülər. Azarkeşlər təklif edirlər ki, məlum məktubun surətini çıxraraq hər birimiz bircə dəfə məktubu "Neftçi"yə ünvanlayaq. Bu hesabla 15000 məktubdan heç olmazsa biri yəqin ki, "Neftçi" klubuna  çatar...