"Xəzər Lənkəran”  komandasının avtobusu dekabrın  6-də saat  14:30-da "Fırtınalar Meydanı”nın ərazisinə daxil oldu. Bir saatlıq istirahətdən sonra komanda  saat 15:30-da stadionun yardımçı meydançasında məşqə başladı. Çox da ağır keçməyən məşqdə futbolçular yardımçı meydançada bir neçə dəfə  dövrə vuraraq qaçdılar. Yolun yorğunluğunu nəzərə alan Rednik futbolçulara istirahət verdi. Qeyd edək ki, "Xəzər Lənkəran”dan ayrılması gündəmdə olan komandanın həkimi Boris Xetaqurov məşq zamanı komandanın yanında idi. Maraqlanarkən öyrənə bildik ki, Xetaqurov səhhəti ilə bağlı yaranan problemlərin üzündən "Xəzər Lənkəran”dan getməyə qərar verib və bu məqsədlə klub rəhbərliyinə müraciət edib.

Futbolçu Kristian Kabralın gedişini isə məşqi izləyən azarkeşlər müzakirə edirdilər. Məşq edənlər arasında futbolçulardan Kamran Ağayev, Elnur Allahverdiyev və Xaqani Məmmədov gözə dəymədi.