Azərbaycanın milli qəhrəmanı Mübariz İbrahimovun xatirəsinə həsr olunan futzal tirnirinə qədər gələn yol.   II yazı. (TƏKRAR)

Payız aylarında keçirilən çempionatın adı elə "Payız əfsanəsi” oldu.

 İdeyalar mənbəyi olan Vaqif Rəşidov bu dəfə yeni bir mini futbol turnirinin keçirilməsi ideyasını təklif etdi. Turnirdə yalnız səhiyyə işçilərinin iştirakını düşünən Vaqif bəy, bəlkə özü də bilmirdi ki, Lənkəranda bu qədər həkim və əczaçı vardır. İştirak etmək istəyində olan komandaların sayı gözlənildiyindən daha çox oldu. Bu səbəbdən də oyunların keçirilmə qrafiki sıx quruldu. Püşk atıldı və "Payız əfsanəsi” başladı... Turnirin qrup oyunları Lənkəran şəhər Olimpiya kompleksinin açıq havada olan mini futbol meydançasında keçirilirdi. Artıq payız idi və bəzi oyunlar yağışlı havada, bəziləri isə hətta leysan yağışda baş tuturdu. "Pley off” mərhələsinin oyunları kompleksin qapalı zalında keçirildikcə oyunu izləyən azarkeşlərin də işi rahatlaşırdı. Gərgin oyunlar ondan da gərgin təşkilati işlər turnirə marağı artırırdı. Bəzi komandalarda LİPA-lar da tapılırdı. Belə komandalardan qazandıqları xallar ləğv olunurdu. İşin gərginliyini görən azarkeşlərdən bəziləri təşkilati işlərdə yardım etmək istədilər və beləcə təşkilati işlər əməlli başlı ictimaiətin nümayəndələrinin iştirakı ilə davam etdi... 

...Amma gərginlik bununla da bitmədi. Maraq və gərginlik elə həddə çatmışdı ki, turnirin sona çatdırılmasında problemlər yaranırdı. Elə bu vaxt "Futbol+” qəzetinin bölgə müxbiri Hüseyn Cəbrayıloğlu bütün çətinlikləri öz üzərinə götürüb çempionatı sona çatdırmaqda əsl qəhramanlıq göstərdi. Final oyunu möhtəşəm alındı. Bir neçə kameranın çəkdiyi final oyununda hər hansı oyun epizodu bütün xırdalığı ilə çəkilirdi. Fotoaparatların çəkiliş zamanı ani işıqlanmaları göz qamaşdırırdı. Komanadaları alqışlayan azarkeşlərin səsindən qulaq batırdı. Qalib gələn komanda Lənkəranın böyük səhiyə müəsisəsini təmsil etdiyindən həmin gün orada adlı sanlı həkimlərə rast gəlmək çətin deyildi. Çempionlar liqasının himni səsləndikcə və yüzlərlə azarkeşin alqışı ilə mükafatlar qaliblərə təqdim olundu. Olimpiya kompleksinin qarşısında dayanan avtomaşınların sayı və xüsusən də markaları göz oxşayırdı...