Tərlan. Satirik qəzəllər

Yoxdu qalıb da

Boş şeydi para, var aramız, yoxdu qalıb da,

Tək pulla ovunmaz yaramız, yoxdu qalıb da.

Yap bizlərə hər bir şeyi, "YAP”dan yapışaq bərk,

Yapdıqca "YAP” olsun yarımız, yoxdu qalıb da.

Sev bizləri, bəsdır bizə bu, kəndini üzmə,

Banklarda batan pullarımız yoxdu qalıb da.

Onsuz da bu millət pula davranmağı bilmir,

Çək olsun hamar yollarımız, yoxdu qalıb da.

Tikdir bina, sal körpü tıxaclar azala qoy,

Bir kimsə də qoymaz buna mız, yoxdu qalıb da.

Ceyhan kəmərin bagla bu beldən, o belə gəz,

Beldən düşə lap şalvarımız, yoxdu qalıb da.

Əl çirkidisə pul, bizi çirkabə batırma,

Qızsın sənə el, sən elə qız, yoxdu qalıb da.

Az səbrimizin qırx yaşı var, eyləmə qəm çox,

Az-çox hələ vardır varımız, yoxdu qalıb da.

Sən Tərlanı sal razı, ola tən yarı işlər,

Vallah deyəcək tən yarımız:-yoxdu qalıb da.

2008

 ***

MİSİR

Demə,  illərdi batırmış əlini qanə Misir,

Oxuyur təhsılə meydan yenə mərdanə Misir.

Çin nədir, lazım olarsa gəzəcək dünyanı,

Gedəcək elm dalınca lap o Taylanə Misir.

İşinə qoysan əgər mız, niyə dərslik satılır?

Deyəcəkdir, nə satılmır ki, bu dövranə – Misir?

-Nədi bu forma, kitab, peç və "müəllim pulu”, nə?

Çatmayır,  söyləyəcək bircə Sibelcanə- Misir.

Ona ver, ver buna day kimlərə vermir yazıq,

Sizcə salmış ələ fürsət elə bir danə Misir?!

Neçə testdən hələ keçmək gərəkir bir tək ona,

Ki, bilə hər birimiz damladı ümmanə Misir.

Bu yanında Kleopatra, o yanında eyham,-

Necə salsın bu qədər ehramı səhmanə Misir?!

Bəsdi Tərlan, adam ol, eyləmə rüsvay bizi sən,

Kimlə əncam eləsin bir belə nöqsanə Misir?

2010

 ***

QALMA DALA

Gördün ki, qaçır hamı yala, qalma dala,

Boş ver düşəcək qalmaqala, qalma dala.

Qır millətinin bel sütunun, durma bekar,

Fürsətkən eli çap və tala, qalma dala.

Kim versə xeyir- YAP ya Müsavat, nədi fərqi,

Tez barmagını bas o bala, qalma dala.

Millətdi deyə hər iki yön, bəddə yenə

Vur gah bu mıxa, gah o nala, qalma dala.

Neftdən özünə süd gölü tikdirmək üçün,

Yağdır yalanı gündə "zala”, qalma dala.

Gördün qoyacaq mız sənə Avropa, həmən

Əvvəlcə tüpür, sonra yala, qalma dala.

Tərlan özü nə istədiyin anlamayır heç,

Sən Tərlana bənd olma, bala, qalma dala.

2007

Mənbə. kultaz.com