6-cı günün  həqiqətləri…

Bizim "Neftçi” fanatları ilə xoş olmayan münasibətlərimizin səbəblərini  analiz edən olubmu ?

Düzü bizim tərəfdə bunu məlum olan halla əlaqələndirirlər ki,bu da  hakimlərin zaman zaman paytaxt klubuna meyilli idarəçiliyidir. Elə futbol qurumlarının rəhbərlərinin də bu klubdan inidki posta yüksəlməsi də nəzərə alınır. Mətbuatın bir çox məsələlərdə ağ-qaralara yaxınlıq etməsi isə cənubluların diqqətindən heç vaxt yayınmır.

Maraqlıdır bəs əks tərəf, yəni "Neftçi” fanatları az qala düşmənçilik səviyyəsində olan münasibətin kökünü nədə görürlər. Biz onların fikirlərini öyrənmək imkanından mərhumuq.

 Amma üçüncü tərəfin, daha doğrusu "Xəzər Lənkəran” və "Neftçi” klubluna azarkeşlik etməyənlərin bəzilərinin fikirlərini öyrənməyə çalışdıq ki, bu da ümumi nəticəyə gəlməyə şərait yaratdı. Beləliklə, hər iki kluba yaxınlığı olmayan futbol azarkeşlərinin bu msəsləyə yanaşması demək olar ki, bir mənalı  oldu:

Müstəqillik illərində futbolumuzda "Neftçi” yə qarşı mübarizə aparan klublar olub, "Qarabağ”, "Turan” ,”Gəncə”…

Amma bu klubların azarkeşləri, sevimli komandaları  haqsızlıqlarla rastlaşarkən səslərini bizim qədər qaldıra bilməyiblər. Belə demək mümkünsə "Neftçi” nin qılıncının hər tərəfi kəsəndə cənub təmsilçisinin azarkeşləri Bakılılara nəinki qarşılıq verdilər hətta onları üstəliyə də biliblər. Müstəqil fəaliyyət göstərən fan klubların bu işdə rolu da   danılmazdır. Əsas məsələ isə odur ki, "Xəzər Lənkəran” yaranandan bəri ölkə futbolunun brendinə çevrildi və bayraqdarı dəbdən saldı. Bütün bunlar üçüncü tərəfin nümayəndələrinin fikirləri idi.

Deyilənlərə "Neftçi” fanatlarının, azarkeşlərinin, tərəfdarlarının və təəsübkeşlərinin qısqanclığını da əlavə etmək olar. 

Premyer liqanın son turlarında "Neftçi” nin bir qrup fanatı əvvəlcə Lənkəranda sonra Tovuzda və nəhayət Bakıda keçirilən  oyunlarda dava-dalaş salmaqla fəallaşdıqlarını göstərdilər. Təəsüf ki, onların fəallığı aqressivliklə biruzə verildi.

Bir az da bu kluba yaxınlıq edənlər haqda.

"Neftçi”nin fanatlarından əlavə azarkeşləri də mövcuddur. Amma onlar stadionlara az hallarda gedirlər. İş yerlərində, çayxanalarda, məclislərdə "Neftçi”ni müdafiə etməklə məşğuldurlar. Tərəfdarları əsasən dövlət müəsisələrində, əsasən də neft sektorunda çalışanlardır. Təəsübkeşləri isə əsl keçmiş "Neftçi”lilərdir ki, onlar artıq bu kluba uzaqdan uzağa nostalji hisslərlə baxırlar. Bir də futboldan anlayışı olmayan və ölkənin müxtəlif yerlərində yaşayan bir qrup tiplərdir. Onlar üçün elə milli komanda da lazım gələrsə "Neftçi” sayıla bilər.  

 Kateqoriyaya bölünən "Neftçi” tərəfinin nümayəndələri  "Xəzər Lənkəran”la  oyunda bayraq yandırılmasından sonra bizə qarşı qismən də olsa birləşməyi bacadılar ki, bu birlik də  uzun çəkmədi.

Ümumi olaraq "Neftçi” tərəfdə olanlarla və xüsusən də fanatları ilə bizim intriqamızın səbəbi birdir. Biz onların ölkə futbolundakı təkhakimiyyətliyinə son qoya bilən bir qüvvəyik. "Xəzər Lənkəràn” ailəsi daha böyükdür və bizi kluba nə nostalji hisslər, nə maddi maraq, nə də digər futbola yadd olan məqamlar bağlamayıb. Biz sadəcə Lənkəranı sevdiyimiz qədər "Xəzər Lənkəran” sevirik. Biz futbolu olduğu kimi qəbul edirik və  biz güclünün qalib gəlməsini istəyirik.

Hər bir hadisəyə açıq gözlə baxmaq və hadisənin səbəblərinə düşüncə ilə yanaşmaq lazımdır ki, həqiqəti görmək mümkün olsun.