Futbol üzrə ali qurumlar olan FİFA və UEFA-ya və hər iki qurumun prezidentləri  cənab Jozef Blatterə və cənab Mişel Platiniyə.   

           Biz bütün bu olanlardan sonra sizlərə müraciət etmək məcburiyyətində qalırıq, futbolda haqq-ədalət olmasını hamı dilə gətirir, lakin hec də hamı əməl etmir. Azərbaycanda futbolun inkişafindan ağızdolusu danışan futbol qurumlarımız görün nə işlərlə məşğul olurlar.

         Bu ədalətsizliklər əsasən onminlərlə azarkeşi olan ‘’Xəzər Lənkəran’’a qarşı baş verir. Ölkənin futbol statistikasına nəzər salsaq, ‘’Xəzər Lənkəran’’ın bir matçına gələn azarkeş sayı, ümumilikdə bir neçə tur digər klubların ümumi azarkeş sayından dəfələrlə çox olur.  Bəlkə də elə bu, futbol qurumlarımızda oturanların qısqanclığına səbəb olur?

         Onların zorla, çökmüş sovet rejimində oldugu kimi, hansısa komandanı nəyin bahasına olursa, olsun çempion etmək istəkləridir. Bu yolda onlar hətta çirkin olan hər bir vasitədən belə istifadə etməkdən çəkinmirlər. Bu komanda sovetdən qalma "Neftçi”dir və sonda onun çempion olmasının şahidi olsanız təəccüblənməyin. Bu vəziyyət bir neçə ildir ki, davam edir. Lakin onu çempion edə bilmirlər ki, bilmirlər. Bu illər ərzində bu komandaya güclü transferlər etmədən, meydandankənar vasitələrlə buna nail olmaq istəsələr də, bunun mümkün olmadığını gördülər. Məhz bundan sonra bir-iki orta səviyyəli transfer etməklə və bu meydandankənar amillərini işə salmaqla istəklərinə nail olmağa çalışırlar. Biz bu illər ərzində Azərbaycan futbolunun yaxın izləyiciləri kimi bunu tam əminliklə deyə bilirik. Lazım gələrsə, buna misal olan oyunlardan videogörüntüləri həm siz özünüz əldə edə bilər və ya biz sizlərə göndərə bilərik.

          Bu, 2010/2011 mövsümü yeni başlasa da, artıq bu işlərə indidən start verilib. Turnir cədvəlində, beş turdan sonra  1-ci və 2-ci yerləri "Xəzər Lənkəran”la bölüşən "Neftçi” üçün artıq belə qara işlərə start vermişlər. "Muğan” komandasını evdə qəbul edən "Neftçi”nin oyuna bir gün qalmış, oyunu idarə edəcək hakimlər briqadasının tərkibində dəyişiklik edildi. Yəni əvvəllcədən təyin olunmuş yan xətt hakimi son anda "sözəbaxan” imici ilə tanınmış E.Nağıbəyova həvalə olundu. Düzdür bunu əvvəlki yan xətt hakiminin ailə vəziyyətində problem olduğu ilə izah edən futbol qurumları sonradan bir maraqlı məqamla bizləri üz-üzə qoydular. Məhz bu matçda, E. Nağıbəyovun yan hakim kimi nəzarət etdiyi cinahda "Neftçi”nin futbolçusu ofsayt vəziyyətinə düşür və E. Nağıbəyov ofsayt faktını qeydə almır, ardınca "Neftçi”nin ofsaytda olan futbolçusu qapıçı ilə adi oyun epizodunda toqquşur və budur baş hakim penalti nöqtəsini göstərir, 1:0. Oyun elə bu hesabla da bitir. "Neftçi” 3 xal "qazanaraq "Xəzər Lənkəran”la yenidən xallarını eyniləşdirir. Halbuki, bütünlukdə matçın ikinci hissəsini "Muğan” klubu rəqibindən xeyli üstün səviyyədə keçirir. Matçsonrası mətbuat konfransında "Neftçi”nin baş məşqçisi "oyunu zəif keçirib, qalib gəlmək də olur” kimi fikirlər səsləndirir.

          Altıncı turda "Xəzər Lənkəran” Salyan şəhərində "Muğan” klubunun qonağı oldu. Matç başlayar-başlamaz heç bir ciddi əsas olmadan matçın baş hakimi Anar Salmanov, "Xəzər Lənkəran” ın futbolçularına bir neçə sarı vərəqə göstərərək onların "əl-qolunu bağladı”. Bundan sonra "Xəzər Lənkəran” ın futbolçuları anladı ki, ikinci başqa bəhanə ilə onları qırmızı vərəqə gözləyir və beləliklə, komandanı azlıqda qoya biləcəklərindən ehtiyatlanıb, məcburi oyunun tempini aşağı salmalı oldular, lazımsız ehtiyatlanma prinsipi ilə oyunu davam etdirdilər. Halbuki, rəqib futbolçuların qat-qat kobud oyunu və rəftarına, Anar Salmanovun "dözümlülük göstərərək” nəinki kart göstərməməsi, onlarla uzun-uzadı söhbət edərək oyunun vaxtını "yeməsi”, sonda da əsas vaxta yalnız 3 dəqiqə  əlavə edərək (İkinci hissədə ən azı 6-dəqiqə vaxt itkisi olsa da ) həvəslə final fitini səsləndirməsi, onun əvvəlcədən hansı "planla işlədiyinin” göstəricisi sayıla bilər. Oyun zamanı  "Xəzər Lənkəran”lı futbolçunun  rəqibin  cərimə meydançasında kobudluqla qarşısı alınanda da  baş hakim hamını heyrətləndirərək zərəçəkəni sarı vərəqə ilə cəzalandırdı. Matç bitəndən dərhal sonra AFFA nümayəndəsinin belə idarəçiliklə təhqir olunmuş "Xəzər Lənkəran” azarkeşlərinə tərəf gəlib onlara barmaq silkələməsi, müxtəlif sözlərlə onları hədələməsi nə dərəcədə qanunauyğundur?

          "Xəzər Lənkəran” a qarşı belə praktikadan əvvəlki illərdə də çox istifadə olunub və bunun özlərinə yarayan effektindən futbol qurumlarında çalışanlar çox faydalanıblar. Birbaşa "Neftçi”yə işləyən, futbol qurumlarında çalışanlar bir çox vasitələrlə, o cümlədən hakimlərin əli ilə çox iyrənc işlər görməkdə davam edirlər. Əvvəllər "Neftçi” rəhbərliyində çalışan insanlar, indi ölkədə ali futbol qurumunda ən yüksək vəzifələrdə çalışırlar. İndiki "Neftçi” rəhbərliyi isə onlara çox yaxın qohumluq əlaqələri olan insanlardır.

          Bütün bunlar sentyabrın 25-də "Xəzər Lənkəran” – "Neftçi” oyunundan əvvəl baş verirsə, onda keçən il olduğu kimi, qarşıdakı bu oyunda "Xəzər Lənkəran”ı hansı haqsızlıqlar gözləyir? Əgər mövsüm başlamamış kiminsə çempion olacağı əvvəlcədən məlumdursa, onda çempionatı keçirmək kimə lazımdır və ya həm ölkə tərəfindən, həm də klublar tərəfindən bu qədər xərclənən pulların nə əhəmiyyəti var?

          Futbol üzrə ali qurumlar olan FİFA və UEFA-ya və hər iki qurumun prezidentləri cənab Jozef Blatterə və cənab Mişel Platiniyə.

Bir neçə il öncə MDB kubokunun finalında oyununu izlədiyiniz və güclü rəqibləri yenərək  turnirin qalibi kimi kuboku başı üzərinə qaldıran  "Xəzər Lənkəran”  indi daha da güclü olmasına rəğmən sifarişləri yerinə yetirən hakimlərin qərəzli əməllərinə və  təzyiqinə məruz qalaraq həmin turnirdə çıxış edən klublardan daha zəif bir komandanı məğlub edə bilmir.Ölkənin futbol qurumları isə nəinki bu hadisələrə qarşı seyirçi mövqe tuturlar, hətta sifarişlərin  "kassir"inə çevriliblər.

Biz "Xəzər Lənkəran” azarkeşləri kimi, doğma komandamızın başına gətirilən, həmçinin bununla da bizlərin təhqir olunması istiqamətində aparılan bu kompaniyaya son qoyulması üçün sizdən kömək gözləyir və nə vaxtsa ölkəmizdə də sağlam futbol şəraitinin yaradılacağına inanmaq istəyirik.

QEYD:Azarkeşlərin müzakirəsinə təqdim olunan mətn İngilis dilinə tərcümə olunaraq FİFA və UEFA-ya göndəriləcək.