Azərbaycan futbolunda nə desən olar...

"Turan” –  "Xəzər Lənkəran”  oyununda qəribə bir hadisə qeydə alınıb.  Beləki,  "Xəzər Lənkəran” komandasının hücumlarının birində yan xətt hakimi futbolçumuzun ofsayda düşməsini  qeydə alıb, baş hakim isə davam işarəsi verib. Vurulan qolu  qeydə alan Fariz Yusifov  meydanın mərkəzini göstərib. Daha sonra meydan sahibi klubun rəhbərləri meydana çıxıblar. Ara qarışıb, hər iki komandanın baş məşqçisi və kapitanları da söhbətə müdaxilə etməli olub. Bundan sonra Fariz Yusifov qərarını dəyişərək oyunu davam etdirib və vurulan həmin qol isə hesaba alınmayıb. Oyunu canlı izləyənlərdən bir çoxunun dediyinə görə həmin qalmaqallı epizodda ofsaydda olan futbolçumuz deyil,  ofsayda düşməyən oyunçu topu götürüb irəliləyirmiş. Başqa sözlə qolun qaydalar çərçivəsində vurulduğunu iddia edirlər.

Ədalətli oyun prizmasından yanaşaraq biz, komandamızın vurduğu hər hansı qolun qaydalar çərçivəsində olmasını istəyirik və elə "Xəzər Lənkəran”a  da təmiz qələbələr  yaraşır. Amma məsələnin digər tərəfi də vardır. Beləki, kubokun finalında məlum biabırçı qolu bir Azərbaycanlı hakim qeydə alırsa və cəmi  7-ay sonra isə digər Azərbaycanlı hakim qeydə aldığı qol qərarını dəyişirsə  burada təzad yaranır. Xaqani Məmmədov bu hakimləri necə hazırlayır ki..?

Axı deyəsən biz təzadlar və müəmmalar ölkəsində yaşayırıq.  Bu ölkənin futbolu da müəmmalı qərarlar və ya qərarların müəmmalı şəkildə dəyişilmələri ilə yadda qalır..!

 Nə olursa olsun verilən qərarlar və dəyişilən qərarlar nəyə görəsə daim "Xəzər Lənkəran”ın əleyhinə sonuclanır ?!

Xaqani Məmmədovun  Fariz Yusifova oyun öncəsi göndərdiyi son təlimatın belə olduğunu düşünmək olar:  "İstəmirsən çəkiləsən çarmıxa, bacarginən gah nala vur gah mıxa...”