20-il əvvəl və bu gün...

20-il əvvəl - bu gün, meydanlara axışanlar qorxu bilmədən, sonunu düşünmədən zülmə qarşı çıxmışdılar. Zülmə qalib gəlməyin yollarını axtaran zaman zalımlar tərəfindən qan töküldü, daha böyük zülmlər edildi məzlumlara...İnsanlar vəhşicəsinə qanına qəltan edildi, ardıyca represiyalar başlandı... Zülm bütün dövrlərdə olub indi də var...  O vaxt meydanlara axışanlara extremist deyənlərin bəziləri, o vaxt üçrəngli bayrağı tikələyib ayaqqabılarını silənlərin bəziləri indi dəyişilibmi güya..?

 Bayrağı başı üzərində asıb zülm edənlərimiz də var, zülmə göz yumanlarımız da, zülmə qarşı çıxmaqdan qorxanlarımız da...  

 İndinin özündə zülm edənlərin sayı heç də azalmayıb, onların əməllərinin  sadəcə forması dəyişib. Dəyişən isə təkcə forma deyil, bəziləri simasını, bəziləri əqidəsini dəyişmişdir... Mahiyyət isə yerində qalıb- zülm !

Yanvar hadisələrində qucağında körpəsi ilə tankın qarşısına çıxan qadınlar olduğu halda indi qadının kölgəsində gizlənən kişilər də var...

O vaxt zalımın kimliyini açıq aşkar demək mümkün olurdusa indi hamı bildiyini deməkdən çəkinir, hamı bilmədiyindən söz salır. 20-il əvvəl bizə kənardan zülm olunurdusa indi özümüz özümüzə zülm edirik, indi cəmiyyətimizdə həkim müəllimə, müəllim tələbəyə, tələbə valideynə, valideyn tabeçiliyində olanlara zülm edir...Polis də bu sırada xüsusi yer tutur, ticarətçi də qulluqçu da.. Hamılıqla biz zülmə meyilli qövmə çevrilirik...

Yanvar hadisələrində verilən canlar xatirinə hansımız bir günahdan keçmişik, hansımız bir borcu bağışlamışıq, hansımız bir gözəl iş görmüşük ki..?

Yanvar hadisələrində yaşananlara görə Rus millətini söyənlər də olurdu, amma anlamırdılar ki, bu hadisə zülmlə qurulan bir zalım imperiyanın sonu olduğu üçün baş vermişdi. Tarixi dəyişən bir imperiyanın sonunda nə olmalı idi ki..?

Bəs indinin özündə tarixi dəyişmək istəyənlər azdırmı ?

Biz özümüz qədər ikinci zülümkar və ya  zülmə tabe olanlar  tapa bilmərik, biz yanvarda şəhid olanlar qədər təmiz ola bilmərik, biz onlar qədər səmimi də ola bilmərik...

Amma hələlik əlimizdən  gələni bircə işdir; yanvar ayının 2-ci dekadasının tamamında şəhidlər xiyabanına ziyarətə getmək.

Yaxşılıq etmək, pisliklərdən uzaq olmaq, yaradana tapınmaq, bağışlamaq, zülm etməmək, milləti və  vətəni sevmək, sadəcə insan kimi yaşamaq və yaşatmaq bəlkə hələ də bizlik deyil... Təki mən yanılaydım...