Mənəvi saflığı olmayanların nə səmimiyyəti nə də ədaləti olmaz. Biz  ədalətsizliklərə qarşı mübarizəmizdə davamlı olduğumuz qədər də zülmə və ədalətsizliyə qarşı üsyan etməklə bəşəriyyətə örnək olan  İmam Hüseyn məktəbindən hələki öyrənməyə çalışırıq. Hər birimiz həyatımız boyunca bu məktəbdə imtahan veririk. Kimlərsə imtahandan üzü ağ çıxmağa çalışır, kimlərsə heç bunun fərqində olmur. Bəzən geri baxmadan ədalət  bildiyin bir iş üçün irəli gedirsən. Bir də baxırsan ki, arxada güvənəcəyin  bir kəs qalmayıb…

Həyatın bütün sahələrində  belə hallarla rastlaşmaq mümkündür. Eyni ilə futbolda da…

        Yalançı dəvət məktublarını imzlayan Kufə əhlindən, vədinə naxələf çıxmaqda fərqlənməyənlər yaşadığımız günlərdə sayca daha da çoxalıb desək yanılmarıq.

Elə zülmü gündəlik əməl rasionuna daxil edənlər, ikiüzlülük və  yalan danışmaq yarışında rekordlara can atanlar da onlardan nəinki geri qalmırlar, hətta bizlərin sayını "təkdən birə” salmaqla da sevinə bilərlər.

       Meydanda tək qalmanın ağırlığını anlamaq üçün müharibə iştirakçısı olmaq da yetmir. Hər müharibə haqqın zəfəri naminə olmadığı kimi, hər mübarizə növü də ədalətə qulluq etmir. Ən azından gərək biləsən ki, nə üçün mübarizə aparırsan və bu mübarizə, hər şeyin ilk olaraq ikiyə bölündüyü bu dünyada, hansı tərəfə qulluq edir...

       Eyni zamanda  mübarizə meydanını görməyənlər, mübarizə aparmanın çətinliyini, həmçinin gözəlliyini dadmayanlar, ədalət anlayışını şəxsi maraqdan kənarda olduğunu qavramayanlar, yalnız gözə kül üfürmək üçün sinə başa əl qatanlar  "O”nun mahiyyətini bəlkə də başa düşməzlər. Başa düşmək üçün isə özünün hansı tərəfdə olmasını anlamaq şərtdir. Bir tərəfdə haqq və ədalətdən savayı hər şey var…

 Digər tərəfdə isə birincidə olmayanların əzizlənərək qorunması və onun uğrunda  mübarizə var, çarpışma var, etiraz var…

QEYD:

Lənkəranda Kərbəla hadisələri ilə əlaqədar keçirilən tədbirlərə qatıldığımızdan saytımızda ardıcıl iki gün ərzində məlumatlar təqdim olunmamışdı…