Masallı rayonunda stadion tikilir. Stadion "Xəzər Lənkəran"ın baş sponsoru "Palmali" Şirkətlər Qrupu tərəfindən inşa etdirilir. Masallıda stadionla yanaşı, Futbol Akademiyası da yaradılacaq. Hatta deyilənlərə görə, "Palmali"nin himayəsi ilə yenə klub da fəaliyyətə başlayacaq.
Redaksiyamıza daxi olan xəbəri dəqiqləşdirmək üçün "Xəzər Lənkəran"ın vitse-prezidenti Tuyqun Nadirovla əlaqə saxladıq. Klub rəsmisi Masallıda stadionun tikilməsi ilə bağlı xəbəri təsdiqlədi: "Bəli, Masallıda yeni stadion tikilir. Amma bu barədə indi sizə ətraflı məlumat verə bilməycəm. çünki tikinti işləri ilə bizim tikinti şirkətimiz məşğuldu. Buna gördə işlərlə bağlı ətraflı məlumatım yoxdu. Yalnız onu deyə bilərəm ki, hazırda stadionun tikiləcəyi ərazi təmizlənir".
Klub rəsmisi akademiyanın açılması ilə bağlı xəbəri də təsdiq etdi: "Masallıda Futbol Akademiyasının yaradılması da planlaşdırılıb. Bundan başqa da futbolun inkişafı ilə bağlı layihələrin olması mümkündü".
Yeni klubun yaradılmasına gəlincə, Tuyqun bəy bunu mümkünsüz hesab edir: "Yox, bu mümkün deyil. Hazırda "Palmali"nin sponsorluq etdiyi bir klub var, o da "Xəzər Lənkəran"dı. İkinci klubun yaradılması nə gözlənilir, nə də mümkündü. Amma başqa klublar istəsə, gələcəkdə Masallı stadionunda oynaya bilər".