Saytımızın e-mail ünvanına Zaqatala azarkeşləri tərəfindən imzlanan  məktub daxil olub. Lakin bir neçə gün ərzində diqqətimizdən yayındığı üçün məktubu yalnız dekabrın 24-də saytda təqdim edə bildik ki, buna görə də məktub müəlliflərindən üzr istəyirik. Beləliklə Zaqatala azarkeşlərinin saytımıza göndərdikləri məktubu olduğu kimi təqdim edirik:

                                                        Zaqatala azarkeşləri tərəfindən müraciət

                                                     Səviyyəsiz legionerlər Azərbaycandan qovulsun!

          Ürək ağrısı ilə Tovuz rayonunda Turan-Simurq futbol qarşılaşmasından sonra qonaq komandanın soyunub-geyinmə otağına olan hücumu eşitdik və bu hadisəni Zaqatalaya, Simurq PFK azarkeşlərinə qarşı hörmətsizlik kimi dəyərləndirdik. Bu başdan onu qeyd etmək istərdik ki, bizdə olan məlumata görə insidentdə yerli Tovuzlu futbolçuların günahı olmayıb, əksinə, onlar aranı sakitləşdirməyə çalışıblar. Hətta, olanlara peşimançılığını dilə də gətiriblər. İnsidentin əsas günahkarları Turan PFK-nın aşağıda adları göstərilən səviyyəsiz legionerləridirlər.

Rəşid Həsənov (Dağıstan), Şamil Sayadov (Dağıstan), Məhəmməd Ərdoğdu (Türkiyə) və Gürcüstan vətəndaşı………………..

Buna görə də bu eybəcər hadisə tovuzlularla zaqatalalılar arasındakı uzun illər boyu olan mehribançılığı və isti münasibətlərə təsir göstərə bilməz. Bir neçə nəfər səviyyəsiz legioner kimdir ki, bizi qabaq-qabağa qoysun. Amma bizim tovuzlulardan (uman yerdən küsərlər) incikliyimiz budur ki, niyə imkan veriblər kənardan Azərbaycana gələn səviyyəsiz adamlar Tovuzda qoçuluq etsinlər, Tovuzun adına ləkə gətirsinlər. Axı belə eybəcər hərəkətlər Tovuzun adına yazılır. Onlar Tovuzu başqa regionlarla üz-üzə qoyurlar. Məgər tovuzluların bu cür səviyyəsizlərə ehtiyacı var?

            Belə hadisələr əslində çoxdan gözlənilirdi. Azərbaycan klubları ağına-bozuna baxmadan futbol oynaya bilən-bilməyən, səviyyəsi və şəxsiyyəti olan-olmayan əksər legionerləri (hamıya aid olunmur) Azərbaycana gətirib heç bir xeyir tapmır. Bu cür legionerlərin Azərbaycan futbolunun inkişafına heç bir xeyri yoxdur. Əksinə, çoxdan müşahidə olunur ki, onlar özlərini meydançada çox həyasız aparırlar. Qəsdən ayaq sındırır, yerli-yersiz hakimlərin üstünə hücum çəkir, yerli futbolçuları az qalır meydançanın ortasında döysünlər. Onlar unudurlar ki, qonaqdırlar və özlərini qonaq kimi aparmalıdırlar. Əks halda onlara həyatı başa salmaq lazımdır (biz də başa salacağıq). Biz azərbaycanlılar yeri gələndə problemlərimizi öz doğma dilimizdə danışa-danışa həll edəcəyik. Onların səviyyəsiz hərəkətlərinə və jestlərinə bizim ehtiyacımız yoxdur.

            Biz Zaqatala azarkeşləri bütün Azərbaycan klublarına müraciət edirik:

            - Hörmətli azərbaycanlılar! Gəlin Vətənimizin patriotu olaq. Xahiş edirik klublar gətirdikləri legionerlərin səviyyəsinə diqqət yetirsinlər. Yerli-yersiz azərbaycanlı futbolçuların üzərində qoçuluq etməyə imkan verməsinlər. Bəyəm biz zəif xalqıq? Əgər qonaq öz yerini unudubsa, ona öz yerini göstərmək lazımdır. Onlara səviyyəsiz hərəkətləri ilə Aərbaycanın müxtəlif regionları arasındakı isti və mehriban münasibətlərə xələr gətirməyə imkan vermək olmaz. Onlar bu gün var sabah yoxdur. Azərbaycanın xeyri də, şəri də bizimdir. Heç kimə imkan verməməliyik ki, Azərbaycandan istifadə edib Azərbaycana qarşı işlər görsünlər. Artıq çoxdan zamanıdır ki, klublarımız ən azı

"6 azərbaycanlı + 5 legioner” sisteminə keçsinlər. Öz yerli futbolçularımıza bu gün oynamağa daha böyük imkan versək, onlar legionerlərin 70%-ni ötüb-keçəcəklər.

            Biz AFFA-nın prezidenti Rövnəq Abdullayev cənablarından, PFL-in prezidenti Ramin Musayev cənablarından xahiş edirik ki, 19.12.2010 tarixində Tovuz rayonunda oyundan sonra xuliqanlıq və səviyyəsizlik edən legionerlər ciddi cəzalandırılsın və Azərbaycandan qovulsunlar. Qoy bu digərlərinə dərs olsun ki, Azərbaycan qaydalarına tabe olmağı bacarsınlar.