Yanvar ayının 25-də gecə saat 01:29:39-da  saytımızın e-mail ünvanına məktub daxil olub. Yalnız texniki səbəblərdən e-mail ünvanına daxil olan məktubdan gec xəbər tutmuşuq. Məktubu Mirça Rednikin təkidi ilə tərcümə edən və göndərən komandanın tərcüməçisi Elvar Quliyev  məktubun saytımız vasitəsi ilə azarkeşlərə çatdırılmasını istəyib və surətinin  də "Fırtına” fan klubuna da göndərəcəyini qeyd edib. Biz də bütün "Xəzər Lənkəran” azarkeşlərinə ünvanlanan məktubu olduğu kimi təqdim edirik:

"İlk olaraq bütün azarkeşlərimizi salamlayıram. Antalyadakı təlim-məşq toplanışımız yüksək səviyyədə keçir. Yəqin mətbuat vasitəsilə də bundan vaxtaşırı xəbər tutursunuz. Təbii ki, hazırlıq matçlarında qeydə alınan nəticələrə görə bəzi azarkeşlərimiz narahatlıq hissi keçirə bilər. Amma bizi sevənlərdən xahişim budur ki, buna görə üzülməsinlər. Unutmayaq ki, bu oyunlar yalnız hazırlıq xarakteri daşıyır və nəticə heç bir əhəmiyyət kəsb etmir. "Xəzər Lənkəran" azarkeşlərinin tələbkar və komandalarından həmişə uğurlu nəticələr gözlədiklərini bilirəm. Nəzərə alaq ki, komandanı çox sayda oyunçu tərk edib və onların yerinə yeni futbolçular dəvət olunur. Biz yeni komanda qururuq. Yeni komandanı qurmaq üçünsə bizə vaxt lazımdır. Azarkeşlərimizin böyük narahatlıq keçirdiklərini hiss edirəm. Məhz buna görə onlara bu mesajı göndərmək qərarına gəldim. Tez bir zamanda güclü bir kollektiv formalaşdırmaq üçün gecə-gündüz çalışırıq. Fevralın 13-de keçiriləcək oyuna qədər əzmkar bir komanda yaradacağımıza inanıram. Sizdən də xahişim budur ki, bizə inanasınız. Sizi əmin edirəm ki, komanda ümidlərinizi doğrultmaq üçün, çempionlugu əldə etmək üçün sona qədər vuruşacaq. Sizin dəstəyinizə isə həmişə ehtiyacımız var. Bu yolda hamımıza uğurlar!"

Hörmətlə sizin  Mirça Rednik

 (Tərcümə edən, "Xəzər Lənkəran”komandasının tərcüməçisi :  Elvar Quliyev)