Nə qədər çalışırıqsa da yenə internet şəbəkəsinin itməsi ilə əlaqədar saytımızda yaranan problemlərdən yaxa qurtara bilmirik. Saytımızın fəaliyyətinin ilk günlərindən  bəri Lənkəranın internet klublarını gəzir və əlimizə düşən informasiyaları azarkeşlərə çatdırmağa çalışırıq.  Bir çox hallarda  isə bizdən asılı olmayan səbəblər üzündən  çətinliklərlə rastlaşırıq ki, bu da saytımızın fəaliyyətində fasilələrə yol verilməsinə səbəb olur. Premyer liqanın XX turunda keçirilən "İnter” – "Xəzər Lənkəran” oyunu haqqında  saytımızda bir başa stadiondan ötürülən məlumatları təqdim edirdik. Matçın birinci hissəsinin sonundan başlayaraq təxminən 25-dəqiqə ərzində Lənkəranın bütün internet klublarında internet şəbəkəsi itmişdi. Biz də oyunun gedişi barədə saytımızı  izləyən azarkeşlərə operativ məluamatlar çatdıra bilmirdik.

Elə ertəsi gün də eyni halla rastlaşdıq. Fevralın 28-də  axşam saatlarında Lənkəranın müxtəlif internet klublarını gəzərək eyni problemlə üzləşdiyimizdə saytın fəaliyyəti passivləşdi.

Əlimizdə olan imkanlardan maksimum yararlanaraq saytımızın fəaliyyətində operativliyə diqqətlə yanaşsaq da təəsüflər olsun ki, bütün dünyanın internetə bağlılığı artan zaman ölkəmizdə hələ də bu biabırçı problemlər öz həllini tapmayıb.

Güman edirik ki, saytımızı diqqətlə izləyən istifadəçilər  problemlərimizi anlayışla qəbul edəcək və saytımızın səhifələrində məlumat ötürücülüyündəki  fasilələrə görə bizi qınamayacaqlar.