Üçüncü nəticə: İkinci dəfə məğlubiyyətsiz, super müdafiə

Unibank Premyer Liqasının 2010/11 mövsümü hələ cəmi 1/4-lik bölümünü arxada qoyub. Buna baxmayaraq təqvim komandaları ikinci dəfə fasiləyə çıxmağa vadar edib. 32 turluq marafonun I rübünə, yəni 1/4 hissəsinə nəzər salıb "Xəzər Lənkəran”ın göstəricilərinə müəyyən qiymət vermək olar. Hər halda, hazırda Türkiyədə təlim-məşq toplanışında olan komandamızın əvvəlki illərlə müqayisədə ilk 8 turda necə oynamağı az maraq doğurmur.

Mirça Rednikin yetirmələri arxada qalan 8 oyunda komandanın hesabına 18 xal yaza biliblər. Bu əvvəlki 6 mövsümün nəticələri ilə müqayisədə 3-cü nəticədir. Komandamız ardıcıl 2 dəfə - 2007/08 və 2008/09 mövsümlərində daha yüksək nəticəyə imza atmışdı. Lakin həmin möhtəşəm startlar da çempionluq üçün yetərli olmamışdı.

Bu il "Xəzər Lənkəran” ilk 8 turu məğlubiyyətsiz başa vurub. Bu, lap 2007/08 mövsümündəki startı xatırladır. Yəni, onda da komandamız startdakı 8 matçda heç kimə qələbə sevinci yaşamağa imkan verməmişdi.

Hazırkı məhsuldarlıq 7 mövsüm sırasında yalnız 5-ci göstərici olsa da, müdafiədəki etibarlılığa tarix boyu həsəd apara bilərdik. Axı əvvəlki 7 mövsümün ilk 8 turunda ən azı 3 top buraxırdıq. İndi isə bu nəticə 3 qat yaxşılaşdırılıb. Yəni, ikinci dəfə məğlubiyyətsiz qət etdiyimiz 8 turluq bölüm super müdafiə ilə əlamətdardır.

Qeyd edək ki, komandamız heç də həmişə 8-ci oyununu elə 8-ci turda keçirməyib. Bəzən təxirə salmalar üzündən 8-ci matçımız sonrakı turlarda baş tutub.

"Xəzər Lənkəran” tarixində Azərbaycan çempionatının ilk 8 oyunu

mövsüm    O     Q     H     M     TOP      X

2004/05     8      4      3      1     7-4      15

2005/06     8      2      1      5     6-8        7

2006/07     8      5      2      1   10-4      17

2007/08     8      7      1      0   18-4      22

2008/09     8      7      0      1   18-3      21

2009/10     8      4      2      2   10-5      14

2010/11     8      5      3      0      9-1     18

Mənbə:lankaranfc.com