Lənkəran futbolunun 90 illiyi.

 Saytımıza daxil olan məlumata görə bu il Lənkəran futbolunun 90 illiyi təntənəli şəkildə qeyd olunacaq. Bu barədə saytımıza Cənub Regional Futbol Federasiyasının prezidenti Sakin Məmmədzadə məlumat verib:

" Mən və Hüseyn Cəbrayıloğlunun həmmüəllifi olduğu " Cənub bölgəsində futbolun inkişaf tarixi” adlı kitabda Lənkəranda ilk futbol komandasının 1921-ci ildə yaranması haqqında məlumat var. Bir daha xatırladım ki, həmin dövrdə lənkəranlı futbolçular qonşu İran İslam Respublikasında cənublu futbolçularla yoldaşlıq matçı keçirib və 1-0 hesabı ilə qalib gəliblər. Bu barədə İranda dərc olunan qəzetlərdən birində matçdan çəkilən foto şəkillə birgə yazıda gedib. Hazırda bəzi informasiyaları dəqiqləşdirmək üçün Hüseyn Cəbrayıloğlu ilə birgə araşdırmalarımız davam edir. İnşallah, bəzi məlumatları, xüsusilə həmin dövrdə futbol oynamış futbolçuların ailələrini tapmaq yönündə çalışmalar yekunlaşandan sonra təşkilat komitəsi yaradıb Lənkəran futbolunun 90-illiyini layiq olduğu yüksək səviyyədə qeyd etmək üçün əməli tədbirlərə başlayacağıq.” Sakin bəy, həmçinin  bu barədə daha geniş və konkret faktlara söykənə biləcək məlumatları olan şəhərimizin sakinlərini  onlara   müraciət etməsini də xahiş edib.