Dostuma məktub.

Salam əziz dostum! İlin son günündə səni unutmadığımı bir daha bu məktubumla sübut edirəm. Üstəlik, sən bizim yaxınlar tərəfindən "İlin dostu” seçilmisən. Heç təəccüblənmə, qardaş. İlin sonudu deyə, buralarda hamı kimisə və nəyisə seçir. İş o yerə çatıb ki, seçilən seçənlərdən çoxdu. Bizim qonşumuz Abı kişini də yaşadığımız blokun 10 nəfərdən ibarət ailəsi "İlin qonşusu” seçdi. Gecələr məhəlləmizdə hara gəldi hürən və məhəllənin sahibsiz olmadığı görüntüsünü yaradan "Çibuş” da "İlin iti” seçildi. Məhəlləmizin narkomanları da sahə müvəkkilini " lin sahə müvəkilli” seçməklə dolayısı ilə təsdiqlədilər ki, bizdə çox vaxt nominasiyalarda qalib gələnlər nəyinsə xatirinə bu şərəfə nail olanlardı. Amma sən həqiqətən yaxşı dostsan və səndən umacağımız yalnız yazacağın şanlı məktublardı. Narahat olma, ilin son məktubunda səni futbolumuzda baş verənlərlə də tanış edəcəm.

Gözün aydın, Nacı Şensoy yenidən ölkəmizə döndü. Gedərkən AFFA-nın binasını partladacağını deyən mütəxəssis yenidən "Turan”ın başına gətirilən kimi AFFA-nın  binasının mühafizəsi gücləndirilib. Heç quş quşluğu ilə oralardan uça bilmir.

Quş dedim hakimlərimiz yadıma düşdü. İnan, hakimlərimiz hər tur elə "quşlar” buraxır ki, 50 ilin quşbazı belə qələt eləməyib. Ölkənin Quşbazlar İttifaqı buna görə üç böyük bəyanat verib. Qardaş, onlar ilk bəyanatlarında quş buraxan hakimlərin ittifaqın üzvü olmadığını bəyan edirdilərsə, sonuncu press-relizlərində Hakimlər Komitəsi ilə birləşməyin mümkünlüyündən söhbət açıblar.

Ramin Musayev də ötən günlərdə qələm əhlindən onu tənqid etməyi xahiş edib. Mən bəzən düşünürəm ki, nə olsun, Petrjelanı 12 dəqiqəyə ölkədən qovdurub, Demyanenkonu "alkaş” damğası ilə ömürlük "şikəst” edib. Ramin bəy gərək bu düşüncə ilə ABŞ-da, nə bilim, İsveçrədə PFL prezidenti olaydı. Demyanenko ilə Petrjela onun bu humanist üzünü görmədən getdilər. Sən Allah, gör, bir nəfər tapılır ki, ona "İlin demokratı” mükafatını versin?  Babək  Quliyev də Musayevin xahişini yerinə yetirmək istəyən kimi "ilin idman jurnalisti” ona mane olur. Vallah aləm bir-birinə dəyib. Son günlər "ilin” sözü o qədər işlənir ki, mən, ümumiyyətlə yatıb bir də fevral ayında durmaq istəyirəm. Di gəl ki, yatsam, bizim "ilin iti” yuxuma haram qatacaq. Odu ki, sən xoşbəxt adamsan, yüksəklikdə durub Vətəni qorumaq nə qədər gözəldi. Oralarda hər quş da uça bilmir, əsgərlər zabitini "İlin zabiti” seçmir, xidmətboyu "Astra” çəksələr də "Mallboro”nu "ilin siqareti” seçib təzad yaratmırlar. Bax, buna görə səni oralarda tək qoyduğum üçün özümü qınayıram. Di, salamat qal! Buralar üçün darıxma. Gələn ilin hansı heyvan üstdə təhvil olunduğundan xəbərsizəm. Bir də ki, neyləyirsən, hansı ildi ?  Onsuz da əsas odu ki, adam ili olmayacaq.

P.S. Dostum, öz aramızda qalsın, məni də biz tərəflərdə "ilin jurnalisti” seçmişdilər.

Mənbə : ”Futbol+” qəzeti.