Qarşıda "Bakı” ilə oyun gəlir.Bu oyuna hazırlaşaraq bir neçə gün öncəki "Neftçi” ilə oyunun ab-havasından uzaqlaşmaq lazımdır.Çünki,”Neftçi” bizim əzəli rəqimizdirsə "Bakı” klubu kubokun finalındakı hərəkəti ilə qazandığı kuboka ləkə salaraq sevinən,eyni zamanda bizə böyük mənəvi zərbə vuran klubdur. Indi biz "Neftçi” üzərində qazanılan qələbənin sevincini bir tərəfə qoyub,matçdan sonra baş vermiş olaylara münasibəti yox "Bakı” ilə oyuna hazılığımızı müzakirə etməliyik. Bu arada "Bosman” fan klubunun maraqlı təklifl də diqqət çəkir. Bəlkə doğrudan da biz "Neftçi” ilə oyuna çox qapanmışıq,bəlkə başqa cür düşünməyə ehtiyac var…

"Bosman” fan klubunun rəsmi internet saytında təqdim olunan yazını diqqətinizə çatdırırıq.

Kişi, kişinin əməlinə qiymət verməlidir.

Son günlər "Böyük oyun”dan sonra başverənlərlə əlaqədar müzakirələr səngimək bilmir. Qarşılıqlı ittihamlar, nəzərdə tutulan əvəzçıxma planları, düşmənçilik xəbərdarlıqları medianın gündəmindən düşmür. Bu heç də hər iki tərəfin azarkeşlərinə yaraşan rəftar deyil. Hər iki klubun azarkeşləri əlbəttə öz klublarını sevir, ona qarşı yönələn hörmətsizliyi həzm edə bilmir.

Amma unutmamalıyıq ki, hər iki komandanın azarkeşləri eyni dövlətin vətəndaşları, dəstəklədikləri klublar isə hər ikisi Azərbaycanı təmsil edir. Biz oyundan əvvəl də müraciətimizdə bu kimi halların baş verməməsini arzuladığımızı bəyan etmişdik. Çox təəssüf ki, bu dəfə də hansısa xoşagəlməyən hallar hər iki tərəfdən qeydə alındı.

  Amma burada təqdir olunası hallar da olmuşdur. "Futbol+” qəzetinin məlumatına görə oyundan sonra "Neftçi” klubunun prezidenti Sadıq Sadıqov böyük bir centlmenlik edərək, "Xəzər Lənkəran” klubunun futbolçularının paltardəyişmə otağına gələrək, onları qələbə münasibəti ilə təbrik etmişdir. Bu həqiqətən də ölkə futbolunda az-az görünən bir centlmenlikdir. İndi biz inanmırıq ki, belə bir hərəkəti edən şəxs, "Neftçi” azarkeşləri tərəfindən növbəti oyunda "Xəzər Lənkəran” bayrağının yandırılmasına mane olmasın. Bu səhv hər hansı bir "Xəzər Lənkəran” azarkeşi tərəfindən edilibsə, onun "Neftçi” azarkeşləri tərəfindən düşünülərək təkrarlanmasına Sadıq müəllimin mane olacağı yəqinliyini yaradır.

  Eyni zamanda oyundan sonrakı qarşıdurmanın olmaması üçün "Xəzər Lənkəran” ın prezidenti özü meydana gələrək, komandamızın azarkeşlərini bu hərəkətlərin böyüməməsinə çağırması və buna nail olması da bir centlmenlik əlamətidir.

Biz hər iki prezidentin bu təqdirəlayiq hərəkətlərini yüksək qiymətləndiririk. Gələcəkdə belə halların baş verməməsi yönündə atılmış böyük addım kimi qiymətləndiririk.

  İndi söz azarkeşlərindir. Dövri qədimdən babalarımız hər hansı qarşıdurmanın olmaması üçün əl verib görüşmüş və böyük faciələrin qarşısını almağa nail olmuşlar. Kişi, kişinin əməlinə qiymət verməlidir. Biz də pisliklərə aparan yolla yox, əl verib görüşməklə, bunların qarşısını almalıyıq.