Bildiyiniz kimi bu gün Azərbaycanın əfsanəvi futbolçusu Anatoli Banişevskinin doğumunun 65 illik yubileyidir. Bu barədə əvvəlki yazımızda tanış olmusunuz. Həm də onunla tanış olmusunuz ki, bu münasibətlə əlaqədar olaraq "Xəzər Lənkəran” azarkeşlərinin bir hissəsi olan "12-ci oyunçu” azarkeş qrupu və "Bosman” fanklubu xüsusi təbrik məktubu hazırlayaraq "Neftçi” klubunun rəhbərliyini və azarkeşlərini təbrik etmək üçün "Neftçi” klubunun bazasında olmuşlar. 

            Burada hər iki fanat qurumunu fanklubumuzun rəhbəri Mirhafiz Babayev təmsil etmişdir. Rəqib düşərgədə olan fanklubumuzun rəhbərinin söylədiklərinə görə burada onu çox mehriban qarşılamışlar. Mirhafiz bəyi "Neftçi” klubunun bazası , muzeyi və məşq meydançalarının şəraiti ilə xüsusi olaraq tanış etmişlər. Klubun bir sıra rəhbər işçiləri bu münasibətdən çox razı qaldıqlarını dəfələrlə qeyd etmiş və bu təşəbbüsə görə həm "12ci oyunçu” azarkeş qrupuna həm də "Bosman” fanklubuna təşəkkür etdiklərini bildirmişlər.

            Məktubu klubun vitse-prezidentinə təqdim edən Mirhafiz bəy, Tahir Süleymanovun ayağa qalxaraq məktubu qəbul etməsi və uca səslə görüş iştirakçılarına oxumasını xüsusi olaraq qeyd etmişdir. Bir saata qədər davam edən görüşdə Tahir bəy bundan çox məmnun olduqlarını belə ifadə etmişdir: - "Mənə bildirəndə ki "Xəzər Lənkəran” azarkeşləri tərəfindən belə bir təşəbbüs var, onda elə bil dünyanı mənə bağışladılar.”

            Sonra hər iki klubun azarkeşlərinin düz yolda olduğunu görüş iştirakçılarının hər iki tərəfi qeyd etmişdir. Azərbaycan futbolunun inkişafı və əminamanlığı naminə atılan belə addımlar hər iki tərəfdən yüksək qiymətləndirilmişdir. 90 dəqiqə əndazədən çıxmamaq şərti ilə rəqibliyin daha məqsədəuyğun olduğunu hər iki tərəf bəyəndiyini söyləmişlər.

            Xüsusi çərçivədə təqdim olunan təbrik məktubunu Tahir Süleymanov əvvəlcə stolunun baş tərəfində qoysa da sonradan onu daha yüksəkdə qoyduğu "Neftçi”nin loqosu təsvir olunmuş xüsusi taxta çərçivəyə bərkidilmiş kiçik ölçülü xalçasının” yerinə qoyaraq, həmin kiçik ölçülü xalçanı "biz qonağımızı əliboş qaytarmırıq deyə Mirhafiz bəyə təqdim etmişdir.

             Daha sonra "Neftçi” klubunun saytı üçün müxtəlif xatirə şəkilləri çəkdirilmiş və Mihafiz bəydən müsahibə alınmışdır. 

 Qeyd: Həm görüşün alımasında xüsusi rolu olan və həm də görüşdəki maraqlı çıxışına görə "Flaqman" fanklubunun rəhbəri Ceyhun Bədəlzadəyə və Səbuhi bəyə təşəkkür edirik.

Mənbə:bosman.at.ua