Braziliyadan məktub var ! 

Salam, əziz nəvəm Flaviyo!

Mən sənin uzun uzadı adını çəkmədən, elə qısaca Flaviyo deyirəm, həmişəki kimi. Çünki sənə görə çox narahat olduğumu bilirsən. Uzun uzadı ad çəkmədən birbaşa mətləbə keçirəm, əziz nəvəm.

Bilirsən ki, sən Azərbaycana gedəndən məndə bu narahatçılıq yaranıb. Heç mən sənin ora getməyinə əvvəldən razı deyildim. Ürəyimə gələn, başımıza gəldi. Bilirsən ki, sənin bu qoca nənən, sən ora getdikdən sonra gündə neçə dəfə internet saytlarını izləyir. Bu mənim üçün çətin olsa da, sənə görə olan narahatlığım məni məcbur edir.

Başları batsın, onsuz da futbol oynaya bilmirlər, arada sənin ayağını qırıblar.

Vəhşidirlər də... Sənə deyirdim axı ora getmə. Yadındadı, sən uşaq olanda, məhəlləmizdə futbol oynayardın. O vaxtı da bir dəfə ayağın burxulmuşdu. Sonradan bildim ki, səni zədələyən həmin qonşu uşağı əslən azərbaycanlı imiş. Buna görə sənin oralara getməyinə heç razı deyildim. Amma məni iki şey çaşdırdı, yoxsa ölsəm də səni ora buraxmazdım. Biri alababat pul verirdilər ona görə, ikincisi də deyirdilər ki, səni elə bir komandaya aparacaqlar ki, çox məşhur bir komandadır. Qoca arvadam, yadımdan çıxıb, bilmirəm "flamenqo” deyirdilər, amma yox, "Flamenqo” elə Braziliyada da var. Bəlkə, "fleqmona” deyirdilər, o da yox. Çünki o gün jurnalda oxuyurdum ki, fleqmona irinli xəstəlikdir. Hə... deyəsən yadıma düşdü, "Flaqman” deyirdilər.

Bir də bilirsən, ordan gələnlər, məni valeh etdi. Lap cavanlığım yadıma düşdü. Elə bildim ki, lap özümüzkülərdi. Biri, Baxa Musinyo idi və səni yağ içində böyrək kimi saxlayacaqlarından çox danışırdı. O birisi, Taha Süleymanyo idi. Onun saç düzümü məni valeh etmişdi. Görmürdünmü, bütün Braziliya ona necə həsədlə baxırdı. Onların dediyinə görə hələ Bakıda futbolçuların qeydinə qalan daha gözəl insanlar var. Öz klublarında işləyən Elnuro Əşrəfinyo. Sağ olsun, onun başçılığı altında sənin zədələnməyinlə bağlı bəyanat da yayıblar. Amma öz aramızda qalsın, orda hər oyundan sonra neçə bəyanat yayırlar? Çünki futboldu da, oyunçular bir birinə dəyib neçə dəfə yıxılırlar. Ya da ki, oradan səni aparmağa gələnlərin dediyi kimi, heç kim sizin oyunçulara toxuna bilməz. Əyər biri sizin oyunçuya toxunsa, o dəqiqə hakimin qəzəbinə tuş gələrək meydandan qovular. Hə, hə bunu ordan gələnlər özləri də deyirdilər. Yəqin bu dəfə hakim sənin qıçını qıran oyunçunu qovmayıb deyə bəyanat yayıblar…

O vaxt onlara inandığıma görə də mən sənin ora getməyinə razı oldum. Yeri gəlmişkən, Allah onun canını sağ eləsin, hakimlər komitəsinin sədrini deyirəm, Xaqano Mamedinyo. O da bütün gücüylə həm özü, həm də hakimləri sizin xeyrinizə işləməyə alışdırıb.

Belə getsə ilin axırında çempion olarsız. Daha sizin üçün nə çətinlik qalır ki? Deyirlər Azərbaycanda futboldan ən yaxşı başı çıxanlar da elə adlarını çəkdiyim adamlardı. Braziliyalılar qədər yaxşı mütəxəssislərdi. Ona görə də onların adını braziliyalı kimi yadımda saxlamışam. Sənə onu da deyim ki, bəlkə onların braziliyalılardan da çox futbol anlayışları var. Çünki dünya futbolunda çox belə hadisələrə rast gəlinib. Nəinki incik sümüyünün çatlaması (bunu yadıma salanda ürəyim az qala çatlayır), hətta qolun, qıçın sümüklərinin sınması, sümüyün dərini də deşib bayıra çıxması hallarına rast gəlinib. Amma heç bir klub bununla bağlı bəyanat zad yaymayıb. Sizin klubun işçiləri isə bu bəyanatı yaymaqla dünyada bir ilkə də imza atmış olublar. İndi braziliyada hamı bundan danışır. Həm də ondan danışırlar ki sənin kimi legionerlər oraya ayaq basandan sonra stadionlarında boş yer tapmaq olmur..

Hə, yeri gəlmişkən bizim bir həmyerlimiz var idi, Dieqo Qusmao qısaca Souza. Keçən il onun qolu sınmışdı, hətta sümüyü bayıra çıxmışdı, amma deyəsən onlar bəyanat zad yaymamışdılar. Bilirsən niyə? Burda deyirlər ki, onların klubunun işçiləri, sizin klubda işləyənlər kimi, peşəkar deyillər, yoxsa gərək FİFA-ya, UEFA-ya ya da BMT-yə yaza bilərdilər.

Nə isə onlar sizin düşməninizdir, əcəb olur onlara. Hə, onu da deyim ki, sizin düşməniniz olan həmin klubun sponsoru olan şirkətin gəmisi neçə gündür bizim sahildə dayanıb. Sabah yola düşürlər.

Bir də ki, sizin klubun belə bəyanatları, sərgüzəştləri çox olduğundan, qonşumuz məşhur serial çəkən Armando ilə söhbət etmişəm. Bu barədə serial çəkməyə söz verib. Dediyinə görə bu Braziliyanın çəkdiyi ən uzun, çoxseriyalı teleserial olacaq. Sənin də əlinə nə material düşsə, yubanmadan bizə göndər. Sən orada qazan, biz də burda serial çəkib pul qazanacağıq. Serialı çəkib qurtardıqdan sonra daha evə pul göndərməyəsən. Özün də futbolu atarsan. Daha sənin üstündə fikrim də qalmaz.

Ordakı məşhur mutəxəssislərə mənim salamlarımı çatdır. Uşaqlıqda mənim adımı qısaldıb Matilda nənə deyərdin. Sənin üçün çox narahatam ay bala.

Sənin: Matilda nənən. Cavab yaz yoxsa ürəyim partlayar.

 __________________________

QEYD: Məktubun məhz bizim əlimizə necə düşdüyünü bilmək istəyənlərə bunu deyə bilərik ki, Matilda nənə məktubun üzərində konkret ünvanı belə göstərmişdi: "Azərbaycanın ən çox azarkeşi olan klubunun Braziliyalı futbolçusuna”. Poçtamptda çalışan əməkdaşlar da bizə müraciət etdilər ki, məsələyə aydınlıq gətirək…

Məktubu tərcümə etdi Təkamül İbrət.