"Neftçi” klubunun rəhbərliyinə İslam Cabbarlı tərəfindən açıq məktub.

    Hörmətli "Neftçi” rəhbərliyi, sizin Azərbaycan futbolunun inkişafında olan rolunuzu danmaq insafsızlıq olardı. (Tərslikdən biz də belə insafsızlarıq.) Beləki, ölkə futbolunu dünyada tanıtdırmaqla "Neftçi” futbol klubu və siz  rəhbərlik Azərbaycan həqiqətlərini dünya ictimaiətinə olduğu kimi çatdırmaqda müstəsna xidmətlərlə seçilmisiniz. Elə "Neftçi”nin  iki rəngi də hər şeydən xəbər verir - ya ağ ya da qara !  Onsuz da bizim həyatımız da futbolumuz da rənarəng deyil və yalnız iki rəngdən ibarətdir...

 2010/11 futbol mövsümünə siz necə hazırlaşmısınız ki, hər şeyi qabaqcadan necə nəzərə almısınız ki, heç nə diqqətinizdən yayınmayıb. Heç bir hakim qabaqcadan qurulmuş plandan kənara çıxmayır, AFFA və PFL də bizlərin səsləndirdiyimiz etirazlara məhəl qoymayaraq və medianın nə çalmasından asılı olmayaraq "Neftçi” üçün "Heyva gülü”nü oynayır. Futbol azarkeşlərini də nəzərə almamış olmazsınız bunu da biz yəqinliklə bilirik. Elə bizləri də diqqətdən kənar buraxmamısınız. Vaxtı vaxtında yaşadığımız evlərdə telefon xətlərimiz kəsilir, işıqlarımız keçir, qollarımız burulur... İndi də qazımızı kəsib bu soyuqda bizi dondurmaq planı işləyir ki, Lənkəranın qaz idarəsində  bunu həyata keçirməyə hazır olan "şərəfli” və "ləyaqətli” icraçı insanlar da tapıldı...

 Mənim də bir təklifim var, amma bilmirəm bu təklif tərəfinizdən necə qarşılanacaq. Beləliklə, "Neftçi” klubunun transferlərinə və klubun digər xərclərinə sərf etdiyiniz halallığı alınmamış o haram pullardan mümkün olarsa bizim qaz pulu borclarımızı da ödəyəydiniz. Əsla bizə əlbəəl pul verməyi düşünməyin ha... Bizlər yuxarıda yeri olmayanlar, lakin aşağıları da bəyənməyənlərik və  biz köhnə düşüncə ilə yaşayaraq o pullara haramdır deyə əl vurmarıq...

 Təklifim xoşunuza gəlmədiyi təqdirdə bir işarənizə bənd olan polis vasitəsi ilə növbəti dəfə qollarımızı burdura bilərsiniz, bu sizin işiniz. Amma xahiş edirəm nə edirsiniz tez edin və yaxşı yaxşı fikirləşib seçim edin, ya  "qaz”  ya  "qol”...

 "12-ci oyunçu”nun rəhbəri Cabbarlı İslam. Lənkəran  şəhəri 12/01/11