Azərbaycanın milli qəhrəmanı şəhid Mübariz İbrahimovun xatirəsinə həsr olunan və iki liqada keçirilən futzal turnirinin son günü möhtəşəm alındı. İlk olaraq meydana həvəskarlar liqasının finalçıları "Talış Petrol” və "Cənub 719”  komandaları çıxdı. Maraqlı alınan oyunun sonunda "Cənub 719” komandası 3:2 hesabı ilə qalib gəldi. Həvəskarlar liqasının çempionuna kuboku Lənkəran Olimpiya Mərkəzinin rəhbərliyi təqdim etdi.

Ardıyca İdman Mərkəzinə toplaşan yüzlərlə futbolsevər, oraya gələn "Xəzər Lənkəran”ın baş məşqçisini ayaq üstə alqışladılar. Mirça Redniki köməkçisi Mihay Teja və tərcüməçi Elvar Quliyev həmçinin, "Xəzər Lənkəran”  klubunun icraçı direktoru Höccət Hacıyev müşaiyət edirdilər.

Güclülər liqasının final oyunu da qonaqlar təşrif buyurandan sonra başladı. Güclülərin finalçıları "Zülfüqar” və  "Vüqar Kərimov” komandaları meydana çıxdı. Gərgin idman mübarizəsi şəraitində keçən oyun 5:2 hesabı ilə daha güclü olan "Zülfüqar” komandasının qələbəsi ilə bitdi.

Sonra turnirin  təşkilatçısı Vaqif Rəşidov,  Mirça Redniki meydançaya dəvət etdi. Rednik çempionatın kubokunu "Zülfüqar” komandasına təqdim etdi. Tribunaya toplaşan futbolsevərlər bu mənzərəni alqışlarla qarşıladılar. Sonda isə şəhid Mübariz İbrahimovun ruhuna  salavat deyildi.

Bu xəbəri saytımızın wap versiyasında da izləyə bilərsiniz wap.12cioyuncu.info