Dekabrın 22-də "Xəzər Lənkəran” komandası stadionun yardımçı meydançasında axşam məşqinə çıxdı. Uinston Parks və Katalin Doman istisna olmaqla bütün futbolçuların qatıldığı məşqdə yüksək əhval ruhiyyə hökm sürürdü. Qapıçılarla çalışan məşqçi Hafiz Əliyev,  Kamran Ağayevə və Orxan Sadıxova ayrıca məşq keçirdi. Kamran qapıda qalaraq zərbələri dəf edəndə, zərbələrin zəifliyindən şikayətlənirdi. Daha sonra kapitan  gənc qapıçıya necə zərbə vurmaq lazım olduğunu göstərdi, bu zaman onun səsi hər yerdə eşidilirdi. Elə o biri futbolçular da Ağayevin səsindən sanki motivasiya olunurdular.

Digər futbolçular gah Mihay Tejanın fiziki hərəkətlərlə bağlı  tapşırıqlarını yerinə yetirir, gah da Mirça Rednikin "Qarabağ”la oyun üçün hazırladığı xüsusi  taktikanı öyrənirdilər. Məşqi çoxlu sayda azarkeş izlədi. Məşq bitəndən sonra stadionun ərazisinə daxil olan avtomobildə klubun prezidenti Mais Mənsimovun və vitse prezidenti Tuyğun Nadirovun  olduğunu gördük.